Një 38-vjeçar është proceduar penalisht pasi ka djegur 3 dynym barishte dhe shkurre në Pogradec. Teksa Shqipëria po has një problem me zjarret, ky person kreu këtë vepër penale me qëllim në fshatin Baçallëk të qytetit juglindor.
Nga ana tjetër 3 drejtues mjetesh janë arrestuar në Maliq, Pogradec dhe Devoll pasi drejtonin mjetin në gjendje të dehur, pa leje drejtimi ose pa targë.
NJOFTIMI NGA POLICIA
Qarku Korçë
Arrestohen në flagrancë 3 shtetas dhe procedohet penalisht 1 tjetër për vepra të ndryshme penale.
Specialistët për Hetimin e Krimeve në Komisariatin e Policisë Pogradec, filluan procedimin penal në gjendje të lirë për veprën penale “Shkatërrimi i pronës me zjarr” për shtetasin O. Y., 38 vjeç, banues në fshatin Gështenjas, Pogradec, pasi në fshatin Baçallëk, Pogradec, ky shtetas ka djegur një sipërfaqe prej 3 (tre) dynymë barishte dhe shkurre.
Gjithashtu specialistët e Sektorit për Policinë Rrugore në DVP Korçë, bënë arrestimin në flagrancë të tre shtetasve për veprën penale “Drejtimi i automjeteve në mënyrë të parregullt” konkretisht:
M. P., 30 vjeç, banues në fshatin Shelegar, Sarandë, pasi në afërsi të fshatit Zëmblak, Maliq, ky shtetas u kap duke drejtuar në gjendje të dehur mjetin tip “Opel”.
S. Sh., 57 vjeç, banues në fshatin Guras, Pogradec, pasi në kryqëzimin e fshatit Vërdovë, ky shtetas u kap duke drejtuar pa leje drejtimi, mjetin tip motor të markës “Yamaha” pa targë.
R. V., 25 vjeç, banues në fshatin Stropan, Devoll, pasi në afërsi të fshatit Baban, ky shtetas u kap duke drejtuar pa leje drejtimi mjetin tip motor të markës “Sgybo” pa targë.
Materialet në ngarkim të tyre i kaluan Prokurorive të Rretheve Gjyqësore Korçë e Pogradec për veprime të mëtejshme.
