Gjykata e Posaçme e Apelit për Korrupsionin dhe Krimin e Organizuar caktoi të dielën masën e sigurisë arrest me burg për ish-drejtorin e IKMT Dibër, Lutfi Miftari dhe Eljo Elezin, administrator i një kompanie minerare të akuzuar për korrupsion.
Miftari dhe Elezi u arrestuan me urdhër të SPAK të premten, pasi administratori i kompanisë “H4 CHROM” dyshohet se i ka dhënë 50 mijë lekë të reja drejtorit të IKMT-së Dibër në këmbim që ky mos të fillonte procedurën për shkeljen e konstatuar tek ky subjekt.
Pas arrestimit të Myftarit ka reaguar edhe kryeinspektori i IKMT, Ajet Zyberaj, i cili ka shkarkuar drejtorin e IKMT në qarkun Dibër.
Zyberaj u shpreh se askush në IKMT nuk është mbi ligjin dhe askush nuk do të gjejë mbrojtje tjetër përveç ligjit. Ndër të tjera ai u ka bërë thirrje gjithë punonjësve të IKMT të zbatojnë procedurat, ligjet dhe të mos bëjnë pis staturën e punonjësit të shtetit.
