Prokuroria Themelore në Gjilan, ka kërkuar caktimin e masës së paraburgimit kundër dy të pandehurve, njëri mjek kirurg e tjetri mjek anesteziolog, nën dyshimin se kanë marrë ryshfet nga një pacient për ta operuar. Sipas kërkesë së gjykatës, H.B. dhe L.M, dyshohet se në bashkëkryerje kanë kryer veprën penale ‘’Marrja e ryshfetit’’, nga neni 421 paragrafi 1 lidhur me nenin 31 të Kodit Penal të Republikës së Kosovës.
Sipas kërkesës së gjykatës, ekziston dyshimi i bazuar se më 29 prill 2023, rreth orës 19:45 minuta, në Spitalin e Përgjithshëm të Gjilanit, të pandehurit H.B. dhe L.M., me qëllim të përfitimit të kundërligjshëm pasuror, si persona zyrtarë, kanë përfituar për vete, në atë mënyrë që i pandehuri H.B. anesteziolog, me rastin e operimit të pacientes, M.S., në repartin e kirurgjisë, ka kërkuar dhe marrë para nga familjarët e saj.
Gjithashtu edhe i pandehuri L.M, mjek kirurg, me rastin e operimit të pacientes së lartshënuar ka pranuar para nga familjarët e të njëjtës.
“Të pandehurit janë arrestuar nga ana e zyrtarëve policorë pas kryerjes së masës së simulimit dhe të njëjtit me urdhër të prokurorit gjenden nën masën e ndalimit 48 orësh”, njofton Gjykata Themelore e Gjilanit./RTK
Discussion about this post