Tiranë, 60-vjeçari arrestohet për abuzimin e së miturës

Një 60-vjeçar është arrestuar nga policia e Tiranës për kryerjen e veprën penale të konsumimit të marrëdhënieve seksuale me të mitur.

“Specialistët për Hetimin e Krimeve të Komisariatit të Policisë Nr. 1 ndaluan me iniciativë shtetasin K.B., 60 vjeç, pasi dyshohet se ka kryer marrëdhënie seksuale me një shtetase të mitur”, njoftoi shkurtimisht policia e Tiranës këtë të mërkurë.

Sipas burimeve policore, dyshohet se e abuzuar seksualisht është një 16-vjeçare, teksa ngjarja ka ndodhur në fshatin Vrap. E mitura ka dëshmuar para grupit hetimor se është përdhunuar nga 60-vjeçari rreth 3 muaj më parë, kur ajo ishte ende 15-vjeçe.

Sipas të miturës, shtetasi me inicialet K.B. e ka futur në një banesë në fshatin Vrap, ku e ka mbajtur për disa orë të mbyllur dhe e ka përdhunuar. Vajza i ka treguar fillimisht nënës së saj për abuzimin dhe më pas ka bërë denoncimin në polici.

Sipas ekspertizës mjekoligjore, rezulton se adoleshentja është e përdhunuar.