Edvin Bode, alias Andrew Bode ka dalë këtë të premte para Gjykatës së Tiranës pasi u arrestua nga forcat Renea dhe Policia e Gjirokastrës si i dyshuar për vrasjen e biznesmenit nga Saranda, Edmond Papa.
Gjykata e Tiranës vendosi të lerë të pa ndryshuar masën e sigurisë “arrest në burg” për Andrew Bode.
Gjatë seancës Bode ka mohuar akuzën, duke pretenduar se nuk ka asnjë lidhje me vrasjen e Edmond Papës.
Personi në fjalë u kap në Memaliaj, ku strehohej nga shtetasi Adriatik Kalemi, një person të cilët i janë bërë dy atentate për ta eliminuar që pas vrasjes së biznesmenit Edmond Papa.
Kujtojmë që Edmond Papa, u vra në atentatin e ndodhur në Tiranë më 16 dhjetor të vitit 2022.
Në vitin 2022, Andrew Bode, në bashkëpunim me dy të tjerë, dyshohet se ekzekutuan Edmond Papën. Disa ditë pas ngjarjes, u arrestua një nga autorët, 30-vjeçari Alban Velo, ndërsa Andrew Bode u arratis. Viktima, pronar i një lokali në Sarandë dhe me precedentë të mëparshëm penalë, u plagos disa herë me armë zjarri teksa po frekuentonte një bar-kafe në zonën e Selitës. Ai u dërgua në Spitalin e Traumës, por nuk arriti dot t’i shpëtonte plagëve të marra duke ndërruar jetë.
Prishja e pazareve të drogës dyshohet se fshihej pas vrasjes së Edmond Papës. Ekzekutimi i tij ka ardhur si kundërpërgjigje e një eliminimi mafioz që i është bërë një kundërshtari të tij gjatë kësaj vere në Tiranë. Megjithëse me profil të ulët, 49-vjeçari dyshohet se ka qenë i implikuar në trafikun e drogës nga Turqia në Shqipëri dhe nga Shqipëria në Angli. Po ashtu, ka dyshime se ai merrej me pastrim parash. Nga verifikimet ka rezultuar se Edmond Papa në Shqipëri kryesisht gjatë verës jetonte mes Sarandës dhe Fierit, por udhëtonte dhe shpesh jashtë vendit.
Discussion about this post