Oltjon Kolonja alias Oltjon Pula, 39-vjeç, një nga tre të dyshuarit për grabitjen me armë të noterit Thoma Kaçi në 20 tetor në Sarandë, kërkon sërish lirinë. Ditën e nesërme, ora 11.30 në Gjykatën e Apelit Gjirokastër, pritet të shqyrtohet kërkesa e 39-vjeçarit për zëvendësimin e masës së sigurisë “Arrest në burg” që Gjykata e Sarandës ka vendosur për të.
Ndërkohë Gjykata më parë kishte vendosur mos pranimin e kërkesës së Kolonjës për sigurimin e një prove që ai dispononte lidhur me ngjarjen, dhe që sipas tij tregon se është i pafajshëm.
Ngjarja që tronditi Sarandën, ndodhi mëngjesin e 20 nëntorit, ku persona të maskuar e të armatosur grabitën noterin Thoma Kaçi. Sipas dosjes hetimore, noteri së bashku me bashkëshorten dolën mëngjesin e datës 20 nëntor nga banesa dhe po prisnin ashensorin. Në ato momente, pranë tyre u afruan dy persona të armatosur, të cilët e pyetën se nëse ai ishte Kaçi.
Më tej autorët i bënë të ditur se kanë një porosi për të kryer dhe për ta vrarë pasi noteri ishte në hasmëri. Dy personat futën nën kërcënimin e armës çiftin e bashkëshortëve në banesë, aty ku dhunuan burrin e më pas morën sasinë e parave.
Për ngjarjen në fjalë ndodhen të arrestuar, Oltjon Kolonja allias Oltjon Pula, Vladrias Himaj dhe Elis Avduli allias Mile Xhafa. Të dyshuarit nuk e kanë pranuar asnjëherë akuzën, madje duke kërkuar në një seancë të para pak ditëve edhe “sigurim prove”, për një provë ende të pa bërë publike që sipas të dyshuarve provon pafajësinë e tyre, kërkesë kjo që është rrezuar nga Gjykata.
Discussion about this post