Aurel Kurti, 28-vjeçari, i cili u arrestua pasi dhunoi bashkëshorten e tij 22-vjeçare Dafina Kurti, dhe e mbajti të burgosur për dy vite në banesën e tyre në Volos, ka dhënë versionin e tij lidhur me ngjarjen.
Mediat greke shkruajnë se 28-vjeçari është shprehur se nuk e ka mbajtur të burgosur, teksa ka theksuar se e vetmja gjë që i intereson është vajza e tyre 2 vjeçe e gjysmë.
“Është gënjeshtër, nuk e kam mbajtur të burgosur. Ajo donte që të largoheshim dhe të shkonim në Angli, ku ishin edhe kushërinjtë e saj. Nëse do të donte të divorcohej, mund të më thoshte. Erdha në Greqi sepse doja një jetë tjetër.
I kisha thënë shumë herë të dilte dhe ajo nuk donte sepse thoshte nuk mundemi.
Punoja nga mëngjesi në mbrëmje dhe shtëpia ime ishte gjithmonë plot për të dhe fëmijën. U grindëm sepse donte të largoheshim” , tha 28-vjeçari.
Ndërkohë 22-vjeçarja, e cila prej dy vitesh dhunohej nga i shoqi dhe mbahej kundër dëshirës së saj në shtëpinë e tyre në Volos, dyshohet se po merr kërcënime nga familjarët e bashkëshortit për të tërhequr padinë e ngritur ndaj tij.
Ajo së bashku me vajzën e mitur janë marrë nën mbrojtjen e shtetit grek. Dafina Kurti ka kërkuar nga autoritetet greke vendosjen e masës së sigurisë me burg për Aurel Kurtin, pasi në të kundërt jeta e saj është e rrezikuar.
Discussion about this post