Akuzohet se zaptoi tokën në Kallm të Durrësit dhe ndërtoi vilë, shpallet sërish në kërkim Kushtrim Selimi

Gjykata e Durrësit ka caktuar masa sigurie, të kërkuara nga Prokuroria,  për shefin e sektorit pranë Agjencisë së Mbikëqyrjes Policore në Durrës, Kushtrim Selimidhe ndaj disa vartësve të tij.

Sipas njoftimit të AMP-së, nga hetimet e kryera është siguruar prova se shtetasi Kushtrim Selimi, gjatë kohës që ka ushtruar detyrën si Shef sektori pranë AMP Durrës, duke shfrytëzuar atributet e pozicionit, ka zaptuar një sipërfaqe trualli, pronë shtetërore në lagjen “Kallm” të Durrësit, ku dhe ka ndërtuar në mënyrë të jashtëligjshme një vilë.

Sipas autoriteteve, punonjësit e policisë, ndaj të cilëve janë caktuar masa sigurie, në dijeni të veprimeve të kundraligjshmë kanë siguruar mjetet e nevojshme për ndërtim.

Gjykata e Durrësit ka caktuar masën e sigurisë “arrest me burg” për Kushtrim Selimin, por ai nuk është kapur bashkë me një shtetas tjetër, ndaj të cilëve është caktuar e njëjta masë dhe të dy janë shpallur në kërkim. Ndërkohë, ndaj ish-vartëses së tij Regina Omeri është caktuar masa “detyrim paraqitje”, ndërsa 4 policë të tjerë janë pezulluar nga detyra.

Ish-zyrtari i AMPS-së, Kushtrim Selimi u bë i njohur pak kohë më parë në media, pasi u akuzua për shantazh ndaj zyrtarëve të lartë të Policisë së Shtetit. Për të njëjtën çështje u arrestuan edhe vartësja e tij Regina Omeri dhe gazetari Ervin Hasanaga, por më pas ata u liruan.

Masat e caktuara nga Gjykata e Durrësit:

Masa e sigurimit personal “Arrest me burg” ndaj shtetasit K.S., i dyshuar për kryerjen e veprës penale “Shpërdorim i detyrës në bashkëpunim”, “Ndërtim i paligjshëm”, “Vjedhje e energjisë elektrike”. Shtetasi është shpallur në kërkim pasi nuk është bërë e mundur gjetja e tij.

Masa e sigurimit personal “Arrest me burg” ndaj shtetasit E.V., i dyshuar për kryerjen e veprës penale “Veprime që pengojnë zbulimin e të vërtetës”. Shtetasi është shpallur në kërkim pasi gjatë kontrollit nuk është gjendur në banesë.

Masa e sigurimit personal “Detyrim për tu paraqitur në Policinë Gjyqësore” ndaj shtetases Regina Omeri, e dyshuar për kryerjen e veprës penale “ Moskallëzim krimi”.

Masa e sigurimit personal “Pezullim nga detyra” ndaj punonjësit të policisë Edmond Plaku me detyrë Ndihmës Specialist i Policimit në Komunitet pranë Komisariatit të Policisë Durrës, i dyshuar për kryerjen e veprës penale “Shpërdorim të detyrës, i kryer në bashkëpunim”.

Masa e sigurimit personal “Pezullim nga detyra” ndaj punonjësit të policisë Skënder Sakaj me detyrë Trupë Shërbimi i Trafikut Urban dhe Interurban në DVP Durrës, i dyshuar për kryerjen e veprës penale “Shpërdorim të detyrës i kryer në bashkëpunim”.

Masa e sigurimit personal “Pezullim nga detyra” ndaj punonjësit të policisë Kastriot Karafili me detyrë Specialist i Rendit në Forcën e Posaçme Shqiponja në DVP Durrës, i dyshuar për kryerjen e veprës penale “Shpërdorim të detyrës i kryer në bashkëpunim”.

Masa e sigurimit personal “Pezullim nga detyra” ndaj punonjësit të policisë Ardian Jonuzi me detyrë Ndihmës Specialist i Policimit në Komunitet pranë Kommisariatit të Policisë Kavajë, i dyshuar për kryerjen e veprës penale “Shpërdorim të detyrës i kryer në bashkëpunim”.