Al Nassr ka koleksionuar fitoren e dytë radhazi në kampionat, duke mposhtur me shifrat 4-0, skuadrën e Al Shabab, të kapitenit Ever Banega.
Vendasit verdheblu, e nisën që në fillim, duke dominuar, me dyshen CR7-Mane, që ishte e rrezikshme në çdo minutë për portën kundërshtare.
Takimi u zhbllokua që në minutën e 13’, me të zakonshmin Cristiano Ronaldo, që u tregua i saktë nga pika e bardhë e penalltisë.
Goli e motivoi shumë Al Nassr, që u hodh në sulm për të gjetur dyfishimin, me CR7 që realizoi me kokë, në minutën e 19’ duke dhënë impresionin e dyfishimit të rezultatit, por VAR, në mënyrë absurde, anuloi golin e portugezit, për një prekje “mikroskopike” të tij, ndaj kundërshtarit.
Megjithatë, pavarësisht një nervozimi të vogël, CR7 e Al Nassr nuk u demotivuan duke gjetur golin pas 19 minutash, përsëri me një njëmbëdhjetë metërsh, të realizuar nga Ronaldo.
Në minutën e 40’, pesë herë fituesi i Topit të Artë, bëri asistmenin, duke shërbyer saktë Sadio Mane, për golin e tretë të takimit.
Nga ky moment filloi të “ndizej” ndeshja, me Al Shabab që filloi të kryente ndërhyrje jo shumë “fair” ndaj kundërshtarëve. Në një nga këto raste, Mane u konfrontua fizikisht me brazilianin Santos, pas një ndërhyrje të rrezikshme nga pas, gjë që i kushtoi një karton të verdhë si senegalezit ashtu dhe kundërshtarit të tij.
Në pjesën e dytë, filloi dhe “gjuetia e madhe”, me lojtarët e Al Nassr që u bënë shënjestër e ndërhyrjeve të rënda nga Al Shabab.
Në minutën e 63, një tjetër prekje e topit me dorë, brenda në zonë, nuk u tolerua nga arbitri, i cili sinjalizoi për penalltinë e tretë të mbrëmjes. CR7 kësaj radhe, u tregua altruist, duke ia lënë goditjen e penalltisë, shokut të tij të skuadrës Ghareeb, i cili ama gaboi duke goditur shtyllën.
Në të 79’ minutë, ish-lojtari i Interit, tashmë kapiten i Al Shabab, Ever Banega, humbi toruan duke ndërhyrë ashpër ndaj Sultan Al Ghannam, gjë që shkaktoi reagimin e mbrojtësit të djathtë saudit.
Pas një rishikimi në VAR, argjentinasi u largua nga fusha me karton të kuq. Në 10 minutat e fundit, pati kohë dhe për golin e katërt, të shënuar pikërisht nga Al Ghannam.
Me këtë fitore, Al Nassr, shkon në kuotën e 6 pikëve në 4 ndeshje, duke rikuperuar ecurinë pozitive pas startit të vështirë./m.b /gijotina.com
Discussion about this post