Nis një epokë e re për Dinamon. 18 herë kampionët e Shqipërisë u rikthyen në Superiore dhe kanë nisur punën për edicionin e ri. Ndryshime të mëdha pritet që të ndodhin në nivelin ne drejtimit, por dhe në mënyrën e organizimit.
Bëhet me dije nga media shqiptare “Supersport Albania” se Dinamo do të ndryshojë emrin, logon, por dhe mënyrën e menaxhimit të skuadrës. Emri i ri do të jetë Dinamo City.
Njëkohësisht do të ndryshojë dhe fanella e skuadrës, ku do të jetë mbishkrimi “Durrës Yachts & Marina”, projekt i dyshimtë i mbështetur shumë nga qeveria e Edi Ramës. Iniciatorët e këtij projekti janë personat që kanë marrë përsipër projektin e qytetit të Durrësit, çka përligj dhe emrin e sponsorit në fanellat e reja.
Në kuadër të këtyre ndryshime, Ardian Bardhi nuk do të jetë investitori i vetëm i klubit Dinamo City, pasi në vijim pritet që të ketë dhe disa biznesmenë të tjerë që do të afrohen në klub.
Dinamo City do ketë bashkëpunim me akademinë e Manchester City, në kuadër të marrëveshjes së nënshkruar nga Rama me sheikët e klubit kampion të Europës.
Ky mund të shihet si një “plan i qëndisur mirë” nga Rama, për të lehtësuar detyrimet taksative për kompaninë e Mohamed Alabbar, e cila, duke investuar në sport, do të ketë shumë lehtësira përsa i përket detyrimeve ndaj shtetit.
Discussion about this post