Rastet me Covid-19 në Evropë janë duke u shtuar, megjithëse shtetet ende nuk kanë marrë masa shtesë. Tashmë aktualisht urdhërohet mbajtja e maskës dhe distancimi fizik mes qytetarëve.
Në Britani, spitalet janë të ngarkuara nga numri i lartë i të shtruarve me Covid-19.
Qeveria atje i beson programit të saj të vaksinimit, por sipas ekspertëve vetëm vaksinimi “nuk është i mjaftueshëm”. Në Rumani situata nga pandemia vijon të jetë tejet dramatike pasi ajo ka kërkuar ndihmë nga vendet e Bashkimit Europian për menaxhimin e situatës.
Në Rumani, vetëm 35% e të rriturve janë plotësisht të vaksinuar kundër COVID-19 krahasuar me një mesatare të BE-së prej 74%.
Prej fillimit të pandemisë, Rumania ka raportuar më shumë se 1.5 milionë raste të koronavirusit, duke përfshirë të paktën 44,000 humbje jete. Në Bullgari do të fillojë zbatimi i skemës së certifikatës së gjelbër që hyri në fuqi më 21 Tetor. Tashmë atje kërkohet pasaporta shëndetësore e nevojshme për të hyrë në qendra tregtare, restorante e ambiente të tjera. Përjashtim këtu bëjnë vizitat në farmaci, banka dhe dyqane ushqimore. Bullgaria ka një nga normat më të ulëta të vaksinimit në Europë.
Në Sofje, qytetarët janë ngritur në protesta për shkak të vendimeve të qeverisë.
