Alarm në Klos, gjenden predha luftarake

Punimet në tokën bujqësore kanë zbuluar vendndodhjen e disa predhave luftarake sot në zonën e Klosit. Menjëherë pas zbulimit të një predhe granathedhëse në afërsi të urës së fshatit Fullqet në shtratin e lumit Mat, janë zbuluar të tjera në vendin e quajtur pazari i vjetër.

Predhat antitank dhe predha të tjera janë gjetur nga banorë e zonës teksa punonin tokën bujqësore në afërsi të ish-repartit ushtarak. Predhat e zbuluara janë marrë nga ekspertët e repartit të xhenios pranë Forcave të Armatosura për t’i demontuar në Tiranë.

Në Maj të vitit 2016, Ministria e Mbrojtjes i çertifikoi të sigurta tunelet e Klosit, ndërsa zona përreth këtyre tuneleve vijon të ketë municione luftarake ende të pashpërthyera.