Ministri i Jashtëm i Ukrainës, Dmytro Kuleba deklaroi se trupat ruse po sulmojnë edhe kopshtet e jetimoret. Në një postim të fundit në “Twitter”, kryediplomati ukrainas thekson se është sulmuar një kopsht fëmijësh dhe një jetimore.
“Sulmet e sotme ruse në një kopsht fëmijësh dhe në një jetimore janë krime lufte dhe shkelje e Statutit të Romës. Së bashku me Prokurorinë e Përgjithshme po mbledhim provat dhe faktet, të cilat do t’i dërgojmë menjëherë në Hagë. Përgjegjësia është e pashmangshme”, shkruan ministri Kuleba.
Pavarësisht rezistencës ukrainase, forcat ushtarake ruse duket se po i afrohen arritjes së qëllimit për të marrë në dorë kryeqytetin e Ukrainës, Kievin, pasi trupat ushtarake ndodhen vetëm 9 kilometra larg qendrës, ku është parlamenti dhe ku po qëndron aktualisht Presidenti Volodymyr Zelensky.
Discussion about this post