Partizani mori një fitore të madhe sot ndaj Teutës me shifrat minimale 0-1, teksa një nga më të mirët në fushë ishte kapiteni i të kuqve, Alban Hoxha. Pas ndeshjes portieri i kombëtares foli për Supersport, ku u shpreh:
“Erdhëm për ta sulmuar lart Durrësin, por ata na vunë në presion dhe u mblodhëm pas për të ruajtur portën. Më vjen mirë që e shpëtova ekipin me dy pritje, por është detyra jonë. Mund ta fitojmë titullin. Kur e ke vetë në dorë është shumë më mirë. Kemi dy ndeshje që janë si finale.
Të jemi të përqendruar. Nëse fitojmë me Vllazninë 99% jemi kampionë. Ne nuk kemi pasur presion gjatë vitit. Kishim objektiv Kupat e Europës, ishim pa merkato dhe ishim më të qetë sepse nuk na e kërkuan titullit. Por arritëm deri këtu, bëmë mirë gjithë kampionatin dhe ndaj Vllaznisë të tregojmë atë që kemi qenë deri tani.
Ekipi është ndërthurur mirë me djem të rinj dhe me lojtarë me eksperiencë. Boshti ka qenë gjithmonë si Bardhi, Asani, unë dhe Belica. Çelësi është grupi dhe loja e Dajës na ka ndihmuar shumë sepse e qarkullojmë topin dhe e lodhim kundërshtarin”, u shpreh Hoxha.
