Alban Skënderaj ka folur për muzikën në ditët e sotme, duke thënë se bëhet kryesisht vetëm për klube, duke harruar që një pjesë e madhe e shoqërisë pret t’i ofrohet diçka tjetër.
Këngëtari tha 90% e artistëve shqiptarë kanë në fokus klubet, pasi aty ka një pagesë të mirë, pa e kuptuar se muzika që të gjithë po realizojnë iu përshtatet vendeve të tilla.
Sipas tij muzika nuk mund të mbahet me 20-vjeçarë, pasi ka edhe një brez tjetër që kërkon gjëra të tjera.
“Problemi me klubin është që nuk është vetëm klubi mjet matës i dëfrimit, i qasjes ndaj muzikës. E kemi bërë ne. 90% e artistëve shqiptarë kanë si fokus klubin, sepse aty ka para, ka pagesa, ka jetë, ka qarkullim, është një biznes. Dhe pa kuptuar, nuk e vërejmë se të gjithë, qoftë edhe unë bashkë, që ndikohemi muzikalisht nga ajo atmosferë dhe bëjmë muzikë vetëm për klube. Ndërkohë që unë nuk mendoj se në shoqëri është vetëm klubi si formë dëfrimi.
Unë mendoj që është edhe një brez tjetër, që kërkon gjëra të tjera, por nuk i ofrohen. Është një pjesë shumë e madhe e shoqërisë që nuk merret fare në konsideratë. Nuk mund të mbahet muzika vetëm me 20-vjeçarë. Për shembull, në klub nuk ke mbi 30. Të tjerët çfarë bëjnë, ku shkojnë? Presin t’u ofrohet diçka. Kur unë bëra koncertin në Pallatin e Kongreseve, nuk e prisja kurrë që do kishte interes. Nuk e prisja kurrë që do ishin 3 netë, diku te 6500 bileta të shitura. Pse? Sepse kishte uri për diçka ndryshe. Këngëtari mbajti një koncert 3-ditor në mars të vitit 2018, të quajtur “Hapësira e një ëndrre”.
Discussion about this post