Deputetja demokrate Albana Vokshi ka shprehur aprovimin e për kërkesën e Sali Berishës për mbledhjen e Kuvendit Kombëtar të PD-së. Vokshi deklaroi ditën e sotme se ajo është pro respektimit të statutit të partisë, si dhe pranoi që të dëgjohen mendimet e të dyve.
“Unë jam për respektimin e procedurave, statutit, në këndvështrimin tim është çështje shumë e rëndësishme sepse nëse nuk zbatohet statuti atëherë përse duhet t’i kërkojmë qeverisë të zbatojë Kushtetutën. Anëtarësia ka të drejtë të mbledhë Kuvendin, ¼ e anëtarëve të Kuvendit, në çdo kohë që kërkojnë. Është një hap përpara për respektimin dhe demokratizimin e partisë. Që kur Basha publikoi vendimin (për përjashtimin e Sali Berishës) e kam thënë mendimin tim se duhen respektuar forumet, mendimi i tyre”, tha ajo.
Nga ana tjetër ajo tha se e mbështet ambicien e Sali Berishës për t’u rikthyer në krye të PD-së, por gjithsesi theksoi se për këtë vendos anëtarësia.
