Albert Halilaj mbyll shkollën në mes të vitit për t’i dhënë tenderin 1 MLN euro Lush Osmanit -

Bashkia Kukës bën investime në riparimin e shkollave në mes të dimrit duke ndërprerë mësimin, vetëm që të harxhojë fondet nëpër tendera para zgjedhjeve. Kryebashkiaku Albert Halilaj ka nisur të merret me vonesë me fondet e institucioneve arsimore. Pak javë më parë në denoncuam se si Halilaj firmosi në kundërshtim me ligjin riparimin e një shkolle në këto ditë të ftohta, nxënësit e të cilës nuk dihet se ku kanë përfunduar

E njëjta gjë po ndodh edhe me shkollën “Avni Rustemi”. Shkolla është 4 katëshe dhe e mbuluar me soletë. Gjatë viteve nuk i është bërë asnjë ndërhyrje dhe si pasojë është amortizuar. Shkolla është ndërtuar në vitin 1972, në kohën e ndërtimit të qytetit të ri të Kukësit dhe prej asaj kohe mirëmbajtja ka qenë minimale.

Shkolla 9-vjeçare “Avni Rustemi” ka rreth 803 nxënës dhe si rrjedhojë propozohet të ketë ndërhyrje të menjëhershme, pasi nuk është vënë kurrë dorë në të.

Duke përfituar nga kjo situatë tani në kohë ngricash do të vihet në zbatim tenderi me objekt “Rehabilitim i Shkolles Avni Rustemi” me fond limit 1 milion euro.

Por para se Haliaj të mburret me projektin ne duam të ngremë disa pyetje;

Pse në gjithë këto vite kjo shkollë me një numër të konsiderueshëm nxënësit është lënë në këtë gjendje?

Si ka lejuar bashkia dhe përgjegjës të tjerë që nxënësit të mësojnë në këto kushte që përveç shëndetit iu kanë vënë në rrezik edhe jetën?

“Flamuri i kuq”

Ndërkohë, Halilaj me këtë tender ka fituar “Flamurin e Kuq” për shkelje të ligjit. Kjo është shenja që vendos Open Data Albania për riskun e korrupsionit.

Fillimisht kanë aplikuar 10 kompani të marrin pjesë në garën për këtë prokurim, por nuk iu është dhënë mundësia as ofertave më të lira. 9 oferta janë skualifikuar menjëherë që në fazën e parë, ku vetëm për 6 prej tyre raportohet se janë mënjanuar për shkak se nuk kanë dorëzuar dokumentin që vërteton se kanë kryer punë të ngjashme më parë.

Ky është një kriter në tender, por kur të gjithave firmave iu mungon ky dokument, ligji sugjeron që AK t’i vërë në dijeni që të vazhdojë më pas me procedurat e tjera të garës.

Komisioni i Halilajt nuk e ka zbatuar këtë rregull, ka eliminuar të gjitha ofertat dhe ia ka lënë kontratën bashkimit të operatorëve :OUEN”sh.p.k – “Shpresa-Al” sh.p.k, kjo e fundit në pronësi të Lush Osmanit, emër i njohur për tenderët e shumta pa garë që ka marrë ndër vite nga Rilindja.

Miqtë marrin dhurata

Si mik i qeverisë Osmani i ka shpëtuar drejtësisë dhe tashmë vazhdon abuzimet pa frikë. Biznesmeni përfiton fonde të mëdha përmes Shpresa.al, por edhe kompanive të tjera që ai zotëron.

Në 25 tetor të 2019, Policia e Durrësit shpalli në kërkim me urdhër të prokurorisë pronarin e kompanisë ‘Shpresa.al”, Lush Osmani. I dyshuar si organizator dhe përfitues si skemës së tjetërsimit tokë shtetërore pranë Kepit të Rodonit.

Osmani u shpall në kërkim policor si i dyshuar edhe për përfitimin e një godine në mënyrë korruptive si pjesë e një grupi të strukturuar kriminal dhe disa javë më pas, Osmani u vetëdorëzua në Policinë e Durrësit.

Fillimisht Prokuroria kërkoi izolimin e tij.

Por më pas, e ndërroi masën në “Detyrim paraqitje” kundrejt garancisë pasurore dhe Gjykata e Durrësit e liroi. Mirëpo, llogaritë e hapura me drejtësinë nuk e kanë penguar Osmanin të jetë i preferuari i qeverisë për tenderët.

Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.