Kryebashkiaku i Memaliajt, Albert Malaj është një nga ata zyrtarë që gjatë verës bënë pushim të plotë dhe në dimër kujtohen të riparojnë rrugët e prishura.
Bashkia Memaliaj ka zhvilluar së fundmi një tender ku jepen 700 milionë lekë. Bëhet fjalë për prokurimin me objekt “Riparimi i shkarjeve ne rrugët e Njësive Administrative Luftinj dhe Buz, Bashkia Memaliaj”. Konkretisht janë 3 rrugë, të cilat kanë pësuar rrëshqitje në disa pika.
Këto rrugë janë të shtruara, por me sa duket jo në cilësinë e duhur dhe nuk janë mirëmbajtur. Në dokumente tregohet se punimet do të mbyllen brenda 2 muajsh, por me vonesat e Malajt punimet mbase bëhen para zgjedhjeve.
Abuzimi me ligjin mbi prokurimet
“Gara” ka qëndruar 1 muaj e hapur dhe me 30 gusht do të zhvillohej tenderi. Gjatë kësaj periudhe u dorëzuan 12 oferta, që premtonin një konkurrencë normale.
Në rastin konkret ofertat e paraqitura nuk u morën në konsideratë, ato u përjashtuan që në fazën e parë, një pjesë e tyre pa marrë asnjë arsyetim për skualifkimin. Vetëm për 6 ofertat më të lira komisioni i Malajt ka marrë mundimin të shpjegojë se cilës prej tyre i mungonte ndonjë dokument në dosjen e dorëzuar tek komisioni.
Në këto raste kompanitë duhet të informohen dhe më pas t’u jepet koha për të plotësuar këto dokumente, nëse ato nuk përgjigjen atëherë skualifikohen automatikisht.
Këto janë procedura që kërkojnë kohë dhe profesionalizëm, por stafi i Malajt thjesht ka zbatuar porosinë. Kështu, në fazën finale komisioni kishte para vetëm ofertën e firmave “SHKELQIMI 07” SHPK – “ VELLEZERIT KUKA” SHPK, me vlerë rreth 520 milionë lekë.
Pa asnjë konkurrent përballë ky bashkim operatorësh u shpall fitues.
Open Data Albania i ka vendosur tenderit “Flamurin e Kuq” që është shenja e riskut të korrupsionit. Theksojmë se kishim oferta të tjera me vlerë 440 milionë lekë deri në 460 milionë lekë, me të cilat nëse do ishte zbatuar ligji, Malaj do të kursente afro 100 milionë lekë!
Por Malaj e kishte ndarë këtë dhuratë për Shkëlqim Kapllanajn, i cili është vëllai i ish-deputetit Agron Kapllanaj. Prej këtij të fundit ka marrë shumë tenderë pa garë në saj të lidhjeve, edhe pse politikisht janë “kundërshtarë” me kryeministrin.
Kapllanaj është një nga personat më të akuzuar nga opozita për lidhjet me kryeministrin Edi Rama. Ai ishte kandidati i Lulzim Bashës për bashkinë e Mallakastrës në zgjedhjet e 14 majit. Qëndrimet e tij kundër Berishës me sa duket janë shpërblyer me tendera.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post