Albi Mëcini, nuk ka pranuar të flasë përpara Gjykatës së Fierit, duke zgjedhur të qëndrojë i heshtur dhe mos treguar asgjë për implikimin e tij në sekuestrimin e 21 kg tritol.
Por njeriu që dyshohet për dy ngjarje të rënda kriminale, ka pretenduar para avokatit të tij, se s’ka asnjë lidhje me tritolin që policia e gjeti në kanal dhe jo në makinën e tij.
Mëcini, u kap nga forcat operacionale brenda automjetit, teksa ndodhej në afërsi të qëndrës “Viva” në Fier.
Ditën e ngjarjes, Mëcini, po udhëtonte me makinën e marrë me qira nga Tirana në drejtim të Vlorës, ku do pushonte.
Me vete kishte një sasi parash, kartën e ID dhe një çantë me rrobat personale. Gjatë hetimeve ka rezultuar se makinën e kishte marrë me qira në Tiranë, vëllai i Mëcinit, i cili ditën e djeshme ja kishte lënë në përdorim Albit.
I kontaktuar në telefon nga “Ora News”, avokati i Mëcinit, Klaudio Dhima, është shprehur:
“…sasia e tritolit nuk është kapur në makinën e klientit tim. Lënda shpërthyese, është gjendur nga policia e hedhur në një kanal, 4-5 metra larg vendit ku Albi Mëcini, kishte ndaluar për të kryer nevojat personale…”.
Teksa Mëcini, ka qëndruar shumë pranë sasisë së tritolit, kanë ndërhyrë agjentët e policisë së Fierit dhe Vlorës, duke sjellë arrestimin e Mëcinit dhe sekuestruar çantën me 21 kg tritol të ndarë në dy pako, ku ishin instaluar dhe dy aparate telefonike.
Mëcini, e ka mohuar në gjykatë implikimin e tij me sasinë e tritolit, duke pretenduar se do ndodhej në atë vend, pasi po ikte në Vlorë për të pushuar.
Por kjo dëshmi, nuk ka bindur gjykatën e Fierit e cila vendosi të caktojë masën e sigurisë “arrest në burg” për Albi Mëcinin dhe të shpalli në kërkim Arafat Manërkollin dhe Ervis Cukalin nga Tirana.
Sasia e lëndës shpërthyese, dyshohet se do vendosej në banesën ose makinën e një eksponenti të njohur të botës së krimit në Fier.
Ndërsa autorët janë kujdesur që aktivizimin e shpërthimit të realizonin nga distanca me telekomandë dhe në largim e sipër ata sipas prokurorisë do përdornin një makinë të dytë, të cilën kishin planifikuar ta digjnin me benzinë.
Nga hetimet e policisë, Mëcini dyshohet se është pjesë e një grupi kriminal që vepron duke kryer vrasje me pagesë në disa qytete të vendit.
Discussion about this post