Kryeministri i vendit, Albin Kurti gjatë seancës së Kuvendit të Kosovës theksoi se në të gjitha takimet e deritanishme ka potencuar përkushtimin e Kosovës që sa më shpejt të arrihet dakordimi final rreth propozimit të BE-së, të mbështetur nga Franca e Gjermania.
Ai tha se Propozimi i Bashkimit Evropian është bazë e mirë për diskutime të mëtejme dhe janë të interesuar të punojnë sa më intensivisht që të finalizohet dhe të nënshkruhet nga palët, por sipas tij nuk mund të ketë Asociacion një etnik në Kosovë.
Kurti ka treguar gjashtë kushtet për formimin e Asociacionit të komunave me shumicë serbe.
Kushtet
Kushti i parë sipas tij është që të jetë në përputhje me Kushtetutën e Kosovës dhe ligjet që janë në fuqi.
Po ashtu, Kurti ka thënë se nuk mund të ketë Asociacion monoetnik.
Pikat që përmendi kryeministri janë si në vijim:
-Asociacioni të bëhet në përputhje me Kushtetutën dhe ligjet në fuqi.
-Asociacioni nuk mund të jetë monoetnik, duhet të ndërrojë emrin, nuk mund të ketë asnjë pushtet publik apo ekzekutiv, duhet t’i shërbejë vetëm bashkëpunimit horizontal të komunave, sipas Kushtetutës
-Të drejtat e pakicave kombëtare duhet ta ngërthejnë parimin e reciprocitetit ndërmjet dy shteteve si dhe të marrin parasysh standardet dhe modelet evropiane.
-Para vendosjes së Asociacionit, strukturat ilegale në veri të shuhen dhe bëhet dorëzimi i të gjitha armëve ilegale.
-Asociacioni është pjesë e marrëveshjes finale dhe zbatohet pas njohjes reciproke dhe pasi Serbia t’i ketë pranuar parimet e kartës së OKB-së në raport me Kosovën.
-Presidenti i Serbisë t’i tërheq letrat e dërguara në pesë shtetet e BE-së për mosaplikimin e Kosovës në BE.
Discussion about this post