Alda Klosi, ish-zyrtarja e administratës, ka kërkuar në Gjykatën e Apelin zbutje të masës së sigurisë “arrest me burg”. Kjo seancë do të zhvillohet të hënën e 20 shkurtit.
Në gjykatë është hedhur shorti që ka vendosur që çështjen në Apel do ta shqyrtojë gjyqtarja Irena Brahimi.
Me justifikimin se ka dy fëmijë të vegjël dhe duhet të kujdeset për nënën e saj, e cila vuan nga problemet e shikimit, Klosi kërkoi lirinë nga burgu. Avokati ka përdorur si arsyetim edhe gjendjen shëndetësore të saj, e cila për disa ditë pas arrestimit mori trajtim mjekësor në QSUT.
Arrestimi i Alda Klosit erdhi pas dëshmisë së Sanitares Rozeta Dobi e cila më herët ishte arrestuar me akuzën e vjedhjes së plot 120 mijë eurove nga shtëpia e zyrtares. Një kontroll i dytë i banesës së Rozeta Dobit dhe djalit të saj Havier zbuloi dhe 405 mijë euro të tjera të cilat mbetën pa zot.
Pak ditë më parë, ish-zyrtares iu sekuestrua ndër të tjera dhe një garazh.
Thellimi i hetimeve nga policia dhe prokuroria e Tiranës si edhe pyetja për disa orë e sanitares Rozeta Dobi zbuloi se gjithçka ka qenë inskenim dhe paratë e gjetura në banesë nuk ishin vjedhur por ish-zyrtarja e lartë ia kishte dhënë për t’i fshehur.
Discussion about this post