Aleanca për Mbrojtjen e Teatrit para SPAK, kërkoi sekuestro preventive të truallit të Teatrit Kombëtar.Në deklaratën për media, juristja Adriana Kalaja theksoi se ky sekuestro i projektit të Bjarke Ingels, aksioneve të shoqërisë Tirana DC dhe fondit të parashikuar për rifillimin e punimeve të teatrit është i domosdoshëm.
Kalaja theksoi hetimet për një vepër penale nuk mund të vijojnë kur ende nuk janë marrë masat e sekuestros preventive.
Gjithashtu, Aleanca kërkoi nga SPAK bllokimin e sheshit të Teatrit Kombëtar.
Në projektbuxhetin e vitit 2022 qeveria ka parashikuar një fond rreth 1.5 miliardë lekë për nisjen e punimeve në Teatrin e Tiranës, i cili tanimë njihet si Teatri i ri Kombëtar.Në total punimet për Teatrin e ri Kombëtar pritet të arrijnë shifrën 4.8 miliardë lekë.
Qeveria ka parashikuar që për vitin e ardhshëm të vërë në dispozicion të këtij projekti një shumë prej 900 milionë lekësh, ndërkohë që ky fond do të rritet në vitin 2023 kur dhe janë parashikuar për t’u lëvruar afro 1.5 miliard Lekë. Ndërkohë që 1 miliard të tjera janë parashikuar të alokohen në vitin 2024, ndërsa 900 milionë të tjera do të paguhet më pas, por pa përcaktuar vitin konkret buxhetor.
Teatri Kombëtar u shemb me 17 maj 2020, ndonëse qytetarë të shumtë dhe artistë që vepronin në këtë godinë e kundërshtuan deri në fund.Pas shembjes artistët që ishin kundër këtij vendimi formuan Aleancën për Teatrin duke e ndjekur në rrugë ligjore shembjen e godinës.
