Aleanca për Mbrojtjen e Teatrit ka dorëzuar një tjetër kallëzim penal në SPAK, këtë herë për prokurorët Sotir Kllapi dhe Manjola Kajana.
Sipas avokates Adriana Kalaja, Kllapi ka vendosur të mos regjistrojë kallëzimin penal e bëra nga Aleanca duke e konsideruar si palë me zyrtarët e korruptuar, ndërsa gjithashtu kërkuan dhe hetim penal ndaj prokurores Manjola Kajana.
“Ne e çmojmë veprimin e prokurorit si bërje palë me zyrtarët e korruptuar, si solidaritet në shkelje të ligjit me kolegët e vet. Ne kemi argumentuar pse prokurori Sotir Kllapi ka shpërdoruar detyrën, duke u bërë palë me zyrtarët që shkelin ligjin. Ne sot kemi dy prokurorë të SPAK të kallëzuar. Ju garantojmë me fuqinë e ligjit se jemi të gatshëm të çojmë për kallëzim penal të gjithë prokurorinë e SPAK, nëse ata nuk do të veprojnë për dosjet tona. Sot arrin në 16 numri i kallëzimeve penale dhe nuk kemi asnjë reagim nga SPAK. Dokumenti i dytë është kërkesa që i kemi dërguar prokurorit Edvin Kondili, për çështjen e teatrit. Ne nuk e dimë ende se në ç’fazë janë hetimet për Teatrin. Ne kemi bërë 8 kallëzime vetëm për çështjen e Teatrit”, tha Adriana Kalaja.
Sipas Aleancës, prokurorët kanë vendosur të mos fillojnë hetime për ambasadorin Luigi Soreca dhe kryebashkiakun Erion Veliaj. Këta të fundit kallëzohen nga Aleanca për “Korrupsion aktiv i nëpunësve të huaj publik”, “Shpërdorim detyre” dhe “Ushtrimi i ndikimit të paligjshëm ndaj personave që ushtrojnë funksione publike”.
