Alfred Balla zgjidhet kryetar i ri i KLP-së

Mbledhja për zgjedhjen e kryetarit të ri të Këshillit të Lartë të Prokurorisë pas largimit të Gent Ibrahimit u zhvillua këtë të hënë.

Përveç anëtarëve të Këshillit të Lartë të Prokurorisë, i pranishëm ishte edhe Prokurori i Përgjithshëm Olsian Çela si dhe përfaqësues nga Ministria e Drejtësisë e Programi OPDAT.

Anëtarët e Këshillit të Lartë të Prokurorisë kanë zgjedhur me 10 vota Alfred Ballën në krye të këtij institucioni. Balla ka qenë deri më tani zv.kryetar i KLP-së, institucioni më i lartë në Sistemin e Drejtësisë për prokurorët.

Vetë Balla tha se kishte karakteristikat e nevojshme për tu zgjedhur, ndonëse ishte kandidati i vetëm. “Mendoj se kam disa karakteristika që plotësojnë kriteret për këtë post”, u shpreh Balla.

Ibrahimi u largua pas tre vitesh për shkak të përfundimit të mandatit.

Kush është Alfred Balla

Ai është zgjedhur me vendimin Nr.19/2018, datë 08.02.2018 nga Kuvendi i R.Shqipërisë, anëtar i Këshillit të Lartë të Prokurorisë si përfaqësues i Shoqërisë Civile. Balla ka përfunduar studimet e larta për drejtësi në vitin 1991 pranë “Universitetit të Tiranës”; studimet pasuniversitare, master shkencor në të drejtën penale në vitin 2012 pranë Universitetit “Justiniani I-rë” dhe mban titullin Doktor i Shkencave Juridike (e drejtë penale) nga viti 2020 pranë “Universitetit Europian të Tiranës”.

Në vitet 1991-1998 ka punuar në detyrën e Prokurorit të sektorit gjyqësor, Zv/Prokurorit të Rrethit dhe Prokurorit të Rrethit në prokuroritë Fier e Lushnje. Në vitet 1998-2003 dhe 2007-2012 ka ushtruar profesionin e lirë si avokat.

Në vitet 2003-2006 ka punuar pranë Këshillit të Ministrave si Inspektor në Departamentin e Kontrollit të Brendshëm Administrativ dhe Antikorrupsionit. Në vitet 2012-2017 ka punuar në pozicionin si Këshilltar Ligjor pranë Gjykatës së Lartë.

Gjatë viteve të punës është angazhuar në organizma jo-qeveritare të shoqërisë civile me fokus drejtësinë penale dhe mbrojtjen e të drejtave të njeriut Balla ka kryer një sërë trajnimesh profesionale brenda dhe jashtë shtetit.

Ka ushtruar dhe ushtron aktualisht edhe detyrën e pedagogut të jashtëm pranë universiteteve të ndryshme në lëndët e drejtë zakonore, procedurë civile, e drejtë penale e posaçme dhe e përgjithshme, praktikë profesionale etj.