Ish-presidenti Alfred Moisiu e quan të gabuar rikthimin e Sali Berishës në PD dhe tentativën e tij për të ardhur sërish në pushtet.
I ftuar në emisionin “Të Paekspozuarit” në MCN TV, Moisiu tha se rikthimi në pushtet i Sali Berishës do të ishte “fundi i dynjasë”.
Ylli Rakipi: Zoti Moisiu, një rikthim i bujshëm po ndodh në skenën politikë shqiptare. Sali Berisha merr PD-në dhe kërkon të udhëheqë opozitën. Çfarë mendoni ju?
Alfred Moisiu: Unë ka pesë vjet, në një bisedë me një ambasador të rëndësishëm, i thashë zoti ambasador përse shkoni ju te Berisha? Ai tha, po Berisha e drejton PD-në. Unë i thashë kështu si veproni ju, e linin në hije këtë tjetrin dhe nuk ka për t’u bërë kurrë. Unë zakonisht nuk flas për ishët. Por, ka ardhur një moment që duhet thënë gjerat siç janë, të paktën ne që i njohim gjërat nga afër. Po kthehen gjërat mbrapsht. Nuk është çështja te individi, por te fatit i këtij vendi. Interesat e këtij populli dhe këtij vendi. Çdo gjë ka kohën e vet. Çdo gjë duhet vlerësuar drejt. Gabime dhe bëhen. Vetëm ai që nuk punon, nuk gabon. Por është tjetër të gabosh, tjetër të kërkosh me ngulm të arrish atë që është e gabuar.
Ylli Rakipi: Pra doktori është gabim në këtë histori?
Alfred Moisiu: Për mua po. Unë kam patur respekt për të. Kam dashur demokracinë dhe e dua demokracinë, dua të mirën e këtij vendi. Por etja e madhe për pushtet të qorollis. Fillimi edhe në atë kohë dukej i mbarë, edhe pse gjërat morën kështu. Dy gjëra janë shumë të rëndësishme për të qëndruar shteti demokratik, zgjedhjet dhe drejtësia.
Ylli Rakipi: Mendoni se Sali Berisha mund ta drejtojë Shqipërinë në vitin 2025?
Alfred Moisiu: Për mua kjo është e pamundur të arrihet. Për vetë faktin që sido të jetë, njerëzit, flasim për pjesën tjetër të popullit shqiptar. Edhe në PD nuk janë të gjithë njëlloj. Është elektorati gri që po zmadhohet nga zgjedhjet në zgjedhje. Nuk besoj… Nëse vjen Berisha do të ishte fundi i dynjasë.
Discussion about this post