Përjashtimi i deputetit Berisha nga Grupi parlamentar i PD-së është bërë me kërkesë të SHBA-ve, deklaron nënkryetari i PD-së, Enkelejd Alibeaj. Deklarata hedh dritë mbi prapaskenat e zhvilluara në selinë blu, për të cilat Basha asnjëherë nuk ka preferuar të flasë hapur me demokratët. I ftuar në emisionin “Open”, deputeti i Partisë Demokratike, Enkelejd Alibeaj ka debatuar me gazetarin Andi Bushati sa i përket largimit të ish-liderit Sali Berisha nga PD.
Gazetari i tha se PD po mban dy qëndrime, pasi sipas tij, për largimin e Berishës nuk pyetet për prova, por e hoqët nga grupi parlamentar, me argumentin se “e kërkon SHBA dhe jemi partner strategjik me SHBA”.
Ndërsa për zgjatjen e afateve të vetingut thonë se do të shikojmë argumentet, analizën, para se të vendosim si do veprojmë, pavarësisht se edhe këtë e kërkon SHBA.
Në përgjigje ndaj Bushatit, Alibeaj tha se për Berishën kishte dy shkresa, fillimisht që Berisha është shpallur “non grata” dhe më pas një kërkesë të dytë që të hiqet nga grupi parlamentar.
Ai gjithashtu tha se duke qenë se Berisha e konsideroi si luftë personale pa i përzier demokratët dhe në bazë të kërkesës së dytë, erdhi vendimi për largimin e Berishës nga grupi parlamentar.
Qëndrimin e Alibeajt e forcoi edhe Grida Duma e cila ndërhyri duke u shprehur se “Kryetari i partisë nuk po e diskrediton Sali Berishën, por nuk mund të hedhë në votim të dhënat e Departamentit të Shtetit, që ai zotëria i kundërshton” – tha Grida Duma.
Më tej, Alibeaj ka shpjeguar përse PD këmbëngulë që të bëhet vetingu i politikanëve. Ai thekson se edhe Rama e di që deputetët e PD janë të pastër.
“Është detyrimi ynë politik dhe moral për të identifikuar cilat janë nevojat e shoqërisë. Këto janë nevoja nga më urgjentet”, tha Aliabeaj.
“Ne, vazhdoi Alibeaj, e dimë mirë që votat tona janë ato që janë në parlament, aq sa janë deklaruar nga KQZ. Janë të gjithë ata deputetë që nuk kanë frikë t’i nënshtrohen vetingut të politikës. Ky është testi moral i parë që politika do të duhet ta kalojë. Ne e provuam në 2018 dhe Rama nuk e pranoi. Ne do të shkojmë dhe do të bëjmë detyrën tonë. Detyra jonë është që nevojat imediate të qytetarëve t’i çojmë në Parlament”. Sipas tij, të gjithë deputetët e PD-së kanë kaluar në vetingun që ka bërë Rama nga 2013 e këndej. “Ti mendon se Rama po të kishte gjetur gjë do ta kishte ruajtur në xhep? Ne duam ta çojmë para se jemi të sigurtë që s’kemi asgjë për të fshehur”, deklaroi Alibeaj.
Kujtojmë se vetingu për politikanët ka qenë hedhur si ide nga demokratët edhe disa javë para vendimit për djegien e mandateve të deputetëve.
