Deputeti demokrat Enklejd Alibeaj ka bërë publike dy emra të propozuar nga grupi i tij për pozicionin e Avokatit të Popullit. Në një deklaratë nga Kryesia e Kuvendit, Alibeaj deklaroi se grupi i tij propozoi emrin e Ledio Brahos dhe Dorian Gjomarkaj për të drejtuar këtë institucion.
“Nëpërmjet qëndrimit dhe pozicionit tonë, kemi mundur të japim sinjale të forta sesi duhet të përzgjidhen përfaqësuesit më të lartë të shtetit shqiptar. Kjo edhe për të vendosur disa kritere shtesë në aspektin politik që duhet t’i ketë Avokati i Popullit. Dua t’ju sqaroj se cilat kanë qenë kriteret kryesore që na kanë çuar në përzgjedhjen e kandidatëve. Një prej tyre ka qenë pastërtia e figurës. Së dyti ishte aftësia profesionale dhe jo vetëm shija apo profili politik për shkak të detyrave që ai ka. Të jetë monitorues i administratës shtetërore dhe i qeverisë. Kemi parë në mënyrën më strikte të mundshme edhe kriteret që kanë të bëjnë me integritetin, të mos ketë lidhje me sigurimin e shtetit dhe diktaturës komuniste. Në përfundim të procesit, grupi parlamentar i PD arriti në mënyrë unanime në dy emra, Ledio Braho dhe Dorian Gjomarkaj”, tha Alibeaj.
Discussion about this post