Deputeti i Partisë Demokratike Enkelejd Alibeaj, ka deklaruar se grupi që ai përfaqëson në parlament ka qëndrim të unifikuar për amnistinë fiskale. Po ashtu ai theksoi se qëndrimi është i njëjtë edhe për pasaportat e arta.
Në një deklaratë për mediat, Alibeaj shtoi se deputetët që ai përfaqëson i kanë thënë ‘Jo’ amnistisë fiskale si dhe pasaportave të arta, pasi sipas tij i hapin rrugë kriminalitetit në vend.
“Është e papranueshme për ne amnistia fiskale, ky është qëndrimi ynë i unifikuar. Po ashtu të njëjtin qëndrim kemi për pasaportat e arta, kjo është shitja e nënshtetësisë shqiptare,” tha Alibeaj.
Po ashtu, duke u ndalur te ligji i lustracionit, Alibeaj theksoi se PD ka depozituar në parlament tre iniciativa ligjore kundër përdorimit të propagandës komuniste.
I pyetur nga gazetarët nëse merr direktiva nga Lulzim Basha, Alibeaj tha se në fakt tani është koha që demokratët të bëhen bashkë për përballjen me procesin zgjedhor.
“Ka qenë me kryetarë të degëve të veriut, këtë javë mund të kemi me ata të jugut. Është momenti që të gjitha strukturat e PD të bëhemi gati për atë që është një nga misionet tona kryesore. Që është përballja në procesin zgjedhor. Një detyrim e kemi ndaj demokratëve, armiku kryesor i shqiptarëve sot është Edi Rama dhe regjimi i tij”, deklaroi Alibeaj.
Discussion about this post