Hetimi i krimeve zgjedhore ka përplasur ministrin e Drejtësisë Ulsi Manja dhe kreun e grupit parlamentar të PD, Enkelejd Alibeaj në Komisionin e Ligjeve këtë të premte.
Alibeaj tha se në raportin e ministrisë së Drejtësisë, si rekomandime për prokurorinë e Përgjithshme dhe SPAK-un, nuk është denjuar të përmendet hetimi i krimeve zgjedhore sidomos pas 180 kallëzimeve penale të PS për zgjedhjet e 25 prillit 2021.
Duke kujtuar raportet e OSBE dhe DASH për ecurinë e këtyre zgjedhjeve dhe ndikimin që ka pasur krimi i organizuar, Alibeaj shprehet se personat përgjegjës duhet të ishin prapa hekurave.
“I dimë tani cilat janë raportet ndërkombëtare lëre më pretendimet tona, të OSBE e DASH së fundmi. Zgjedhjet e 25 prillit u karakterizuan nga shkelje shumë të rënda të ligjit përfshirë fenomenin e përhapur masivisht të shitblerjes së votave, përdorimin e aseteve publike, vjedhjes së të dhënave personale, patronazhistët e famshëm tashmë e për këto shkelje PD ka depozituar 180 kallëzime penale, nga të cilat 150 në prokuroritë e juridiksionit të përgjithshëm e 50 kallëzime penale në SPAK. Më lejo një konstatim të raportit tuaj, duket një lloj bezdisje që ju ka dhënë kjo çështje, në rekomandimet tuaja nuk e trajtoni fare, se pavarësisht se nuk kanë përfunduar hetimet e 180 e kusur kallëzimeve që kanë lidhje me zgjedhjet, ju s’keni denjuar të jepni si rekomandim për 2021 hetimin e krimeve zgjedhore. Çështje e ndjeshme për një çështje akoma më të ndjeshme ju keni heshtur, ka një shpjegim arsye apo jo”, tha Alibeaj.
Ndërsa ministri Manja për të dalë nga situata e vështira tha se pret hetimet nga prokuroria dhe jo të ngrejë akuza në sajë të ngjyrimeve politike.
Discussion about this post