Gara e vërtetë politike e Partisë Demokratike janë zgjedhjet e 2027-ës, sipas këshilltarit demokrat në Këshillin Bashkiak të Tiranës, Ilir Alimehmeti.
Alimehmeti është një nga të përfolurit për t’u propozuar si garues për mandatin e kryebashkiakut në zgjedhjet e ardhshme lokale, por deri atëherë qyteti mund të shkojë edhe në një garë të pjesshme nëse do të shkarkohej kryetari aktual.
Në emisionin “3D”, këshilltari demokrat tha se ai nuk do të ishte i prirë të merrte pjesë në një garë të pjesshme, por mund ta merrte parasysh si mundësi në 2027-ën, kur të 61 bashkitë do të jenë për votim.
“Këto janë zgjedhje të pjesshme, ku nuk garohet as në ekip, se Këshilli Bashkiak vazhdon deri në 2027-ën, nuk garohet as me program, se një vit nuk ka çfarë programi bën – buxheti, plani, strategjia afatmesme. Të gjitha tashmë janë miratuar, mirë a keq. Dhe ç’është më e rëndësishme, PD-ja në këtë rast ka për detyrë rikthimin në legjitimitet të Bashkisë së Tiranës. Unë personalisht jam lojtar grupi. Kërkoj të garoj bashkë me Këshillin Bashkiak. Kërkoj të garoj me një program zhvillues,” tha z. Alimehmeti.
Vendimmarrja se cili do të garojë nën siglën e PD-së në zgjedhjet e mundshme vendore, Alimehmeti tha se i takon kryetarit të partisë. Ai tregoi edhe kush e meriton, sipas tij, që të kandidohet nëse do të vlerësohej gara brendapartiake.
“Znj. [Jorida] Tabaku ka performuar më mirë [në garat e brendshme dhe të jashtme],” u shpreh Alimehmeti.
Discussion about this post