Alimehmeti: Me këto zgjedhje, nuk shkojmë dot drejt Evropës

Pas rezultateve të zgjedhjeve të 11 majit, kandidati i Partisë Demokratike në listën e koalicionit “Shqipëria Madhështore” për Tiranën, Ilir Alimehmeti, ka reaguar në një intervistë për “MCN Live”, ku bëri një analizë të thelluar të procesit zgjedhor dhe të situatës që pasoi.

Alimehmeti u shpreh i prerë se zgjedhjet nuk u zhvilluan në mënyrë të ndershme dhe të barabartë, duke cituar si PD-në, ashtu edhe raportin paraprak të OSBE/ODIHR si burime që evidentuan intimidimin e votuesve, përdorimin e administratës publike në funksion të fushatës, dhe blerjen e votës gjatë ditës së zgjedhjeve.

“Nëse edhe në vitin 2025 nuk dimë të organizojmë zgjedhje të lira e të ndershme, atëherë Shqipëria nuk shkon dot në Evropë.

Këto nuk ishin zgjedhje evropiane.

Do përmend këtu raportin dhe deklaratat e përfaqësuesve të OSBE/ODIHR, të cilët e kanë cilësuar këtë si “raporti më i keq që kemi nga viti 2001”, duke nënvizuar se gara ishte e pabarabartë dhe se ka pasur dëshmi konkrete për intimidim dhe manipulim të rezultatit.

Ju kujtoj gjithashtu se kur ndodh situata e krimit zgjedhor, zakonisht numëruesi i fundit shkon në burg, ndërkohë që kush e ka kërkuar shtrembërimin votës, nuk shkon, prandaj u them të kenë kujdes nga ky drejtim, të zbatojnë ligjin”.

Alimehmeti tha se do të ketë një analizë të brendshme brenda PD-së për të reflektuar mbi gabimet, por theksoi se pjesa më e madhe e përgjegjësisë bie mbi mazhorancën.

“Qeveria ka përgjegjësinë kryesore. Kur përdor administratën për fushatë, kur ndodhin pazare me bandat, kur përmenden zyra juridike të lidhura me blerje votash, nuk mund të flasim më për demokraci funksionale. Kjo nuk është rruga drejt BE-së.

Si ka mundësi që institucionet injorojnë fenomenin e blerjes së votës dhe nuk ndërhyjnë? A do të bëjmë drejtësinë vetë? Nëse po, atëherë sistemi është i kapur.

Pavarësisht rezultatit, PD kishte një program të fortë dhe alternativa të qarta për qytetarët, por “kur procesi është i deformuar, çdo diskutim mbi rezultatin humbet kuptimin”.

Shqipëria ka nevojë për zgjedhje të ndershme sepse nga kjo përfitojnë të gjithë. Demokracia ka nevojë për garë reale, jo për manipulim dhe intimidim”.