Policia e Tiranës ka arrestuar 5 persona për vjedhje, kallëzim të rremë e moskallëzim krimi, dy prej të cilëve rezultojnë me precedentë të mëparshëm kriminale.
Sipas njoftimit, arrestimi i këtyre personave u bë pasi u kapën në flagrancë duke tentuar të vidhnin në banesën e një shtetasi në rrugën “Selaudin Bekteshi”. Gjithashtu dyshohet se kanë vjedhur edhe banesën e një shtetaseje në Lanabregas.
Këta persona studionin vendet dhe banesat që vidhnin dhe vepronin në orët e vona të natës, duke ndërprerë ndriçimin elektrik të rrugës dhe të kamerave në hyrje të banesave.
Po në kuadër të operacionit u bë kapja dhe arrestimi i V. K., 33 vjeç, banues në rrugën “Bajram Curri”, i dënuar më parë. 33-vjeçari ishte në ndjekje nga shërbimet policore të Komisariatit të Policisë Nr. 4, pasi kishte vjedhur një automjet “BMW”, në pronësi të një shtetasi me banim në rrugën “Myslym Keta”.
Gjithashtu, po në kuadër të operacionit u bë arrestimi në flagrancë për veprat penale “Kallëzimi i rremë” dhe “Moskallëzim krimi” i A. K., 47 vjeç, banues në Tiranë dhe F. L., 48 vjeç, banues në Tiranë, të dy të dënuar më parë për vrasje dhe vjedhje.
A. K. kishte bërë kallëzim të rremë në Komisariatin e Policisë Nr. 4, se i kishin vjedhur automjetin, i cili u gjet i braktisur në anë të rrugës në Peqin të Elbasanit. Ky person në vitin 1997, në bashkëpunim me një shtetas tjetër, ka vrarë me armë zjarri, një person, në zonën e Laçit dhe për këtë ka kryer 18 vite burgim. F. L. ka kryer 16 vite burgim në Itali, për vrasje.
Këta persona, pasi kanë vuajtur dënimin me dy vite burg në Zvicër, për vjedhje, nga viti 2018 deri në vitin 2020, janë dëbuar nga Zvicra dhe janë kthyer në Shqipëri.
Nga hetimet rezulton se këta dy shtetas, së bashku me një shtetas tjetër që aktualisht ndodhet në Angli, ushtronin veprimtarinë kriminale në fushën e vjedhjes në Itali e Zvicër, në formën e një grupi kriminal.
Discussion about this post