Deputeti socialist Alqi Bllako pritet që gjatë ditës së sotme t’i paraqesë Kryetares së Kuvendit, Lindita Nikolla dorëzimin e mandatit si deputet i Republikës së Shqipërisë dhe të përballet me akuzat e SPAK për inceneratorët si qytetar i thjeshtë.
Kjo lëvizje e Bllakos vjen pasi SPAK kërkoi arrestimin e tij si i implikuar në aferën e inceneratorëve, ku nisur nga njoftimi i SPAK , Bllako akuzohet për një sërë shkeljesh. Në njoftim në Facebook, vetë Bllako shkruan se është i tronditur nga kërkesa e SPAK dhe se shprehet i bindur që nuk ka shkelur ligjin, megjithëse fjalën e fundit do ta thotë drejtësia.
Sipas njoftimit të SPAK, Bllako akuzohet se ka bashkëpunuar me ish-ministrin e Mjedisit Lefter Koka për aferën e inceneratorët të Fierit, në kohën kur mbante pozicionin e Ish Sekretarin e Përgjithshëm të Mjedisit. Të dy bashkë akuzohet se kanë përgatitur dokumentacion të falsifikuar në lidhje me të dhënat e pronës së shpronësuar, duke paraqitur dhe propozuar pranë Këshillit të Ministrave projektvendimin dhe relacionin për shpronësim për kategorinë e pronës “tokë truall”, ndërkohë që rezulton e provuar se prona është “tokë arë”.
Nga hetimet e kryera kanë rezultuar të dhëna se nga ana Bllako, gjatë kohës që ka shërbyer në fillim me funksionin Sekretar i Përgjithshëm i Ministrisë së Mjedisit dhe më pas Drejtor i Përgjithshëm i Agjencisë Kombëtare të Ujësjellës Kanalizimeve dhe Infrastrukturës së Mbetjeve (AKUM), është favorizuar shoqëria koncesionare “Integrated Technology Ëaste Treatment Fier” sh.p.k., kundrejt marrjes në mënyrë të tërthortë të përfitimit të parregullt në shumën prej 14,964,900 (katërmbëdhjetë milion e nëntëqind e gjashtëdhjetë e katër mijë e nëntëqind) lekë.
Gjithashtu, Bllako është akuzuar nga opozita se babi i tij ka përfituar rrogë 10 milionë lekë të vjetra në muaj, pasi i biri i kishte siguruar një pozicion pune fiktiv si drejtor kantieri në inceneratorin e Fierit. Gjithashtu, SPAK bën me dije se është vënë nën sekuestro apartamenti në Tiranë që rezulton të jetë në pronësi të Edmond Bllakos, babait të deputetit.
Pas inceneratorit të Elbasanit, hetimet e prokurorisë së posaçme kanë çuar në goditjen e zyrtarëve të përfshirë dhe në inceneratorin e Fierit. Përveç anëtarëve të komisioneve të prokurimit, ish administratorit në Fier, drejtorit të Albpetrolit dhe një zyrtari lokal, emri më i spikatur është ai i deputetit socialist Alqi Bllako, arrestimi i të cilit pritet të ndodhë ditën e sotme.
Discussion about this post