Altin Morina, lidhje nga Nikla në Ekuador dhe akses deri te Gledis Nano

Tiranë, 24 Maj 2025 – Dosja e operacionit “Ura”, zbardhur nga SPAK, nxjerr në dritë një nga rastet më të rënda të infiltrimit të krimit në strukturat e shtetit: ish-efektivi i RENEA-s, Altin Morina, nuk ishte thjesht një ndihmës, por bashkëpunëtor aktiv i trafikantëve të drogës me rrjet ndërkombëtar.

Nga RENEA në rrjetin e kokainës – Morina dhe Ndërnjaku, dyshe e errët

Morina del si pjesë e grupit kriminal të strukturuar me në krye Ekil Ndërnjakun, një emër i njohur i botës së errët të trafikut të drogës. Nga hetimet e SPAK, rezulton se të dy merreshin me transportin e lëndëve narkotike drejt Italisë, kryesisht hashash, marihuanë dhe kokainë.

Në një nga bisedat përmes aplikacionit të enkriptuar Sky ECC, Ndërnjaku e pyet për kamionë nga Spanja:

Ekil Ndërnjaku: “Ka kamiona nga Spanja? Ne transportin na duhet rregullisht… fusim minimumi 150 kile bar e çokollatë.”
Altin Morina: “Ok, që ta dij dhe unë ku e ka transportin përherë.”

Gjermani, Spanjë, Ekuador – Morina me kontakte globale të krimit

Në një tjetër episod, në shtator të vitit 2020, Morina i referohet një lidhjeje të re:

Morina: “Fola pak me një shok në Gjermani, ka bërë një dalje.”

Ndërnjaku: “S’e di, dëgjojmë njëherë çmimet, që të flasim me robt.”

E pabesueshme, por e dokumentuar nga SPAK: Morina kishte kontakte edhe në Ekuador, një nga vendet burimore të kokainës në Amerikën Latine:

Morina: “Më shkrujti një shok që e kam në Ekuador.”
Ndërnjaku: “Shok flasim nga afër…”

Nga laboratori te sistemi TIMS – Morina i jepte informacione sensitive grupit

Një nga aspektet më të rënda të dosjes është përdorimi i aksesit policor nga Morina për të ndihmuar grupin kriminal. Kur Ndërnjaku kërkon të dijë informacione për një person me mbiemrin Dosku, Morina kërkon të dhëna në sistemet e Policisë dhe madje kontaktin e drejtpërdrejtë e ka me ish-drejtorin e Policisë së Shtetit, Gledis Nano.

Kur drejtësia manipulohet me “gjilpërë” – arma e Mond Çekiçit dhe ndërhyrja e Morinës

Në një tjetër episod shokues, më 24 shtator 2024, një bashkëpunëtor i paidentifikuar i kërkon Ndërnjakut të ndërhyjë në raportin mjekoligjor të një arme të sekuestruar. Arma ishte në pronësi të Edmond Koçit, alias Mond Çekiçi, i arrestuar i armatosur në Durrës. Për këtë punë, Ndërnjaku i beson “shokut të policisë”:

Ndërnjaku: “Shok, me të pyt, a kemi ndonjë me rregulla në Tiranë? Kanë kap një shok me armë, dhe t’ia rregullojmë gjilponën.”
Morina: “Po po, e marr vesh kush është.”
Ndërnjaku: “Mond Çekiçi.”

I kapur, liruar, rikapur – Morina i shpëton drejtësisë herë pas here

Morina nuk është emër i panjohur për autoritetet. Në mars 2023, u kap me 113 mijë euro cash në makinë, por u lirua një muaj më vonë. Në prill 2025, u arrestua sërish në kuadër të operacionit “Revanshi”, i akuzuar për bashkëpunim me Durim Bamin në kultivimin e kanabisit në Nikël dhe Tapizë të Krujës.