Antonio Cassano dhe Jose Mourinho vijojnë replikat në distancë, teksa në fundjavë tekniku portugez i kujtoi ish-sulmuesit italian një sherr të hidhur me kroatin Marco Livaja, kur të dy ishin te Interi.
Në fakt dihet pak për këtë sherr, pasi nuk ishte folur asnjëherë më parë, megjithatë vetë Cassano ka zgjedhur Instagramin për të sqaruar çfarë ka ndodhur.
Ish sulmuesi italian ka deklaruar se ka pasur një debat shumë të ashpër me Livajën, por vetëm kaq, pasi dy ditë më vonë janë bërë sërish miq si më parë.
“Të dashur ndjekës. Në Bobo TV do të sqaroj gjithçka për çfarë ka ndodhur. Por dua të them diçka në avancë për Jose Mourinhon dhe atë që ka thënë për Marko Livajën.
Kam debatuar me Livajën, madje edhe më shumë se kaq, por pas dy ditësh ishim miq si më parë. Në jetë më kanë mësuar të mos kem frikë nga askush dhe asnjë nuk më ka vënë përpara”, shkroi ndër të tjera Cassano.
Një javë më parë ish-sulmuesi italian akuzoi Mourinhon se nuk e dëshiron futbollin, por vetëm rezultatin dhe bën lojëra të shëmtuara për ta arritur atë.
Ndërkohë portugezi iu përgjigj, duke e thumbuar për sherrin pikërisht me sulmuesin kroat Marko Livaja.
Discussion about this post