Në nisje të sezonit të ri televiziv, Autoriteti i Mediave Audiovizive ka apeluar për më shumë respektim të etikës dhe rregullave në raportim nga ana e të gjitha televizioneve.
Gjatë deklaratës së saj, AMA e vë theksin te “ligjet” që duhet të kihen parasysh kur raportohet për Covid-19, dhe të respektohen kërkesat etike dhe profesionale për t’i njoftuar dhe paraqitur lajmet e transmetuara në një mënyrë të vërtetë, të paanshme dhe objektive.
“Kohët e fundit në ofertën programore të televizioneve një hapësirë të konsiderueshme ka marrë edhe trajtimi i pandemisë Covid-19. AMA ka vlerësuar dhe vlerëson maksimalisht rolin dhe kontributin e redaksive audiovizive në mbulimin e ngjarjeve të aktualitetit mbi pandeminë dhe trajtimin e situatës. Në këtë sezon të ri programor, AMA beson se OSHMA-të do të kenë parasysh kërkesat etike dhe profesionale për t’i njoftuar dhe paraqitur lajmet e transmetuara në një mënyrë të vërtetë, të paanshme dhe objektive”.
Një vëmendje të veçantë i ka kushtuar dhe programeve për fëmijë, teksa shkruan se duhet të ndiqet me prioritet mbrojtja e fëmijëve nga përmbajtjet e dëmshme audiovizive.
“Emisionet me/për fëmijët krijojnë ndjeshmëri tek audienca, te fëmijët, prindërit, të afërmit apo kujdestarët e tyre. Trajtimi i fëmijëve si të rritur, apo si gjenerues të emocioneve të panevojshme në emisione, janë dukuri që duhet të shmangen, qoftë në transmetimet e drejtpërdrejta apo ato të regjistruara. AMA ka mirëpritur dhe mirëpret, që edhe në këtë sezon të ri të shmanget përdorimi i fëmijëve në ekran, apo transmetimi/ritransmetimi i përmbajtjeve të papërshtatshme për moshën e tyre, në orare që ata mendohet se janë para ekranit”, shkruan AMA në deklaratën e saj.
Ndër të tjera, AMA shkruan televizionet duhet të kenë parasysh interesat e publikut, balancën në paraqitjen e opinioneve dhe krijimin e hapësirave për ekspertët e mirëfilltë të fushës.
