“Urojmë popullin e Shqipërisë për zgjedhjet parlamentare dhe presim të vazhdojmë partneritetin tonë të ngushtë me Shqipërinë”. Ky është reagimi i parë i ambasadës amerikane në Tiranë, lidhur me zgjedhjet parlamentare të 11 Majit, që nxori fituese Partinë Socialiste në pushtet me 83 mandate.
Përmes këtij reagimi, duket se amerikanët njohin procesin zgjedhor në Shqipëri, që është karakterizuar me akuza të forta nga demokratët për pandershmëri dhe në kundërshtim me ligjin.
Partia Demokratike ka deklaruar se nuk i njeh zgjedhjet, që sipas tyre u manipuluan masivisht nga PS në pushtet dhe kryeministri Edi Rama duke përdorur mekanizma të ndryshme. Zyrtarë demokratë nuk e kanë fshehur se shpresonin te një mbështetje nga SHBA-të për të rrëzuar procesin zgjedhor, megjithatë reagimi i kësaj të marte nga ambasada amerikane duket se tregon se administrata Trump i ka dhënë dritën jeshile përbërjes së parlamentit të ri.
Problematikat e shumta në zgjedhje u evidentuan edhe në raportin paraprak të ODHIR. Disa nga shqetësimet më të mprehta lidhen me blerjen e votave, ndikimin e krimit, presionin ndaj administratës, apo abuzimin e PS me burimet shtetërore dhe aktivitetet institucionale gjatë fushatës, përfshirë politika specifike si falja e gjobave dhe lehtësirat sociale të zbatuara afër zgjedhjeve.
Discussion about this post