Kryeministri Edi Rama ka reaguar në lidhje me sqarimin që ka bërë ambasada e Zvicrës në Shqipëri në lidhje me një shembull që ka përdorur prej disa ditësh qeveria shqiptare se në këtë shtet qytetarët ndëshkohen me 3 vite burg nëse vendosin kondicionerin më shumë se 19 gradë.
Ambasada e Zvicrës tha se ky është një keqkuptim, ndërkohë Rama kërkoi falje se mund të ketë rënë pre e një informacioni jo të saktë dhe tha se do të informohej me shumë.
“Lidhur me shembullin që sollët, s’e kam dëgjuar këtë keqkuptim, nuk e di por nuk ka rëndësi, mbase mund të jetë një shembull që vjen si rezultat i një keqkuptimi, mbase kam rënë dhe unë viktimë e një informacioni jo të plotë e të saktë. Kërkoj ndjesë jemi në një kohë të tillë, por kjo nuk do të thotë aspak që bota nuk është e mbushur me masa të tilla shtrënguese. Unë do e verifikoj e do e marr vesh saktësisht si është rasti por shikoni Gjermaninë, shikoni Britaninë e Madhe se si vendet e zhvilluara që nuk të shkon mendja po paraqesin para popujve të tyre planet e kufizimeve të energjisë, gjë që ne nuk kemi dëshirë ta bëjmë. Për ata qe me përmendin Kosovën, Kosova ka halle shumë të mëdha të një natyre tjetër që vijnë nga një strukturë tjetër e prodhimit të energjisë por Kosova përgatitet për kufizime dhe më të rënda. Ndërkohë jemi në bashkëpunim për të ndihmuar njëri-tjetrin sa më shumë“, tha Rama.
Discussion about this post