Ambasadorët të sinqertë: Ka deklarata të padobishme, por…

Ambasadorët e vendeve që hartuan planin franko-gjerman kanë folur për marrëveshjen e arritur mes Kosovës dhe Serbisë dhe mbi të ardhmen e saj.

Ambasadori francez Olivier Guerot dhe ai gjerman  Jorn Rohde, në një diskutim të mbajtur sot mbi këtë temë në qendrën mediatike në Çagllavicë, janë pyetur edhe për pasojat që ka paralajmëruar Unioni po s’e zbatuan marrëveshjen Kosova e Serbia.

Dy diplomatët refuzuan të tregojnë konkretisht mbi pasojat që do të kenë dy shtetet fqinje, por thanë se paralajmërimi qëndron, megjithëse u treguan optimistë se marrëveshja do të zbatohet.

Rohde tha se i kanë dëgjuar deklaratat, për të cilat tha se janë të padobishme, por se në Bruksel nuk ka tregues që palët s’do të zbatojnë atë për të cilën janë marrë vesh.

“BE e ka bërë të qartë se do të ketë pasoja, por nuk po punojmë për pasoja, por për zbatimin e marrëveshjeve. Të dyja palët duhet të punojnë për marrëveshjen që janë zotuar. Askush nuk kemi parë në Bruksel indikacione nëse duan t’i zbatojnë, kemi parë deklarata që nuk janë të dobishme, por po punojmë shumë në Bruksel”, tha Rohde, derisa paralajmëroi edhe një vizitë të emisarit Lajçak në Prishtinë e Beograd.

“Kjo shoqërohet me vizitën e emisarit special në Prishtinë sërish për të folur me Qeverinë e Kosovës dhe pastaj do të shkojë në Beograd, si dhe do të takohet me komunitetin serb të Kosovës. Prandaj, ka një dialog politik për t’i bindur palët për ta bërë gjënë e duhur”.

Ndërkaq, Guerot tha se s’do ta prishë frymën me të cilën u nis ky diskutim, prandaj foli për “pasojat pozitive”.

“Dua të përfundoj me një ton pozitiv. Nëse e lexoni nenin 13 të marrëveshjes në Bruksel, i shihni pasojat pozitive. Shpresojmë të ketë pasoja pozitive për popullatën. Njerëzit e rëndomtë do të fitojnë nga kjo, si nga komuniteti serb dhe ai shqiptar”.

Këtu ai përmendi konferencën e donatorëve nga e cila do të rrjedhë pakoja financiare për Kosovën dhe Serbinë.

“Bërja e marrëveshjes dhe realizimi i saj ka një potencial për ta bërë jetën e tyre shumë më të thjeshtë”.

Ambasadori gjerman sërish mori fjalën, duke i bërë jehonë Procesit të Berlinit, për të cilin tha se shërben për të afruar Ballkanin Perëndimor me BE-në, derisa përmendi edhe kohën e zbatimit të marrëveshjes.

“Procesi i Berlinit është i dizajnuar që ta sjellë Ballkanin Perëndimor në gjirin e BE-së. Presim një nivel përkatës të hisedarëve politikë. Kjo marrëveshje është arritur dhe duhet të zbatohet, jo të themi në pesë vjet, por shumë shpejt, duke patur parasysh situatën gjeopolitike. Nuk është vetëm BE, por edhe ato vende jashtë që qëndrojnë pas kësaj marrëveshje, siç është Norvegjia dhe Zvicra”.