Kreu i Partisë Demokratike, Sali Berisha, ka komentuar ardhjen në Tiranë të ambasadorit të ri të Shteteve të Bashkuara, Eric Wendt, si dhe mbledhjen e Këshillit të Sigurisë Kombëtare të thirrur nga Presidenti Bajram Begaj. Deklaratat e tij u bënë gjatë një komunikimi në Facebook, teksa iu përgjigj pyetjeve të qytetarëve.
I pyetur nëse ka marrë ftesë për ceremoninë që Ambasada amerikane pritet të organizojë më 2 tetor për prezantimin e ambasadorit të ri, Berisha tha se nuk ka informacion lidhur me këtë aktivitet, ndërsa i uroi mirëseardhjen Wendt.
“E uroj mirëseardhjen ambasadorit, nuk kam asnjë dijeni për ceremoninë”, u shpreh Berisha.
Berisha u pyet gjithashtu për mbledhjen e Këshillit të Sigurisë Kombëtare, të cilën Presidenti Bajram Begaj e ka thirrur të hënën lidhur me çështjen e ish-kreut të SHISH, Vlora Hyseni.
Kreu i PD-së bëri të ditur se deri më tani nuk ka marrë ftesë për të qenë pjesë e mbledhjes.
“Nuk kam marrë asnjë ftesë”, deklaroi kreu i PD-së.
Ambasadori i ri amerikan, Eric Wendt, mbërriti një ditë më parë në Tiranë për të nisur misionin e tij diplomatik në Shqipëri. Ndërkohë, këtë të shtunë ai u prit në Pallatin e Brigadave nga Presidenti Bajram Begaj, të cilit i dorëzoi letrat kredenciale, duke marrë zyrtarisht detyrën si ambasador i Shteteve të Bashkuara në vendin tonë.
Discussion about this post