Ambasadori i Britanisë së Madhe në Tiranë, Alastair King Smith, ka paralajmëruar se gjatë këtij viti do të do të sanksionohen politikanë dhe bisnesmenë shqiptarë. Pa përmendur emra konkretë, në një deklaratë të dhënë nga Elbasani për mediat, ambasadori britanik u shpreh se në këtë mënyrë do t’i jepet fund pandëshkueshmërisë.
Ai komentoi dhe zgjedhjet lokale që pritet të mbahen më 14 maj të këtij viti dhe u shpreh se kandidatët për kryetarë bashkie duhet të jenë figura larg krimit e korrupsionit. King Smith foli dhe për emigrantët e paligjshëm shqiptarë dhe tha se Britania e Madhe do të vijojë të ndërmarrë aksione për ndëshkimin e trafikantëve.
Deklarata
“Gjatë këtij viti do të ketë aksione të mëtejshme. Gjatë vitit 2023 do të sanksionohen politikanë dhe bisnesmenë shqiptarë. Do të ketë të tjerë non grata për t’i dhënë fund pandëshkueshmërisë. Do të marrim aksione kundër trafikantëve. Ne do të vijojmë që të investojmë për arsimin dhe universitetet. Kandidatët në zgjedhjet vendore të jenë larg korrupsionit dhe krimit.
Dhe mos ketë keqpërdorim të burimeve shtetërore. Dua të flas dhe për emigraciinon. Jemi të shqetësur sepse shumë të rinj po largohen nga Shqipëria në mënyrë të paligjshme. Mesazhi ynë është ‘mos shkoni në këtë mënyrë atje’, e vërteta nuk është ashtu siç tregohet nga trafikantët. E rëndësishme është që të zbatojmë marrveshjen e përbashkët mes dy vendeve.
Në bazë të kësaj marrëveshjeje, Shqipëria shihet si një vend i sigurt dhe ata që ikin ilegalisht, do të kthehen. Përveçse do të ndërmarrim aksione kundët trafikantëve, do të sigurohemi që personat që ikin në mënyrë të paligjshme të mos e bëjnë më. Qeveria britanike e njeh dhe e vlerëson shumë kontributin e komunitetit shqiptar në Britani. Ne do të marrim masa ndaj personave të përfshirë në kriminalitet”, tha ai.
Vitin e kaluar, Britania shpalli “non grata” Sali Berishën.
Discussion about this post