Ambasadori britanik: Partitë në Shqipëri të tregohen korrekte, nuk duam t’i shohim në rrugë

Ambasadori britanik, Alastair King-Smith, ka komentuar sot situatën politike në vendin tonë. Përmes një interviste televizive ai tha se është mirë që të gjithë aktorët politikë të përpiqen që të shmangin krizën politike në të ardhmen. Sipas tij politika është shumë më e vështirë në një demokraci parlamentare, por duhet shumë përpjekje që asnjëra të mos përfundojë në rrugë.

“Shpresojmë të mos kemi një krizë serioze politike në të ardhmen, sepse një nga gjërat më të mira që u arrit ka qenë rikthimi i parlamentit me të gjitha partitë brenda parlamentit, që kanë punuar për demokraci efektive parlamentare. S’është e lehtë të kesh demokraci parlamentare. Duhet kohë dhe përpjekje. Duhet kohë që njerëzit të gjejnë kompromiset e nevojshme për të rënë dakord se si të kalojnë ligjet e nevojshme. Kemi çështje me rëndësi për mbarëvajtjen e reformës zgjedhore. Se si mund të përparohet me të tjera ligje. Duhet ta nxitim demokracinë parlamentare si parimin kryesor të zhvillimit”. U shpreh ai.

Më tutje ai tha se partitë politike në Shqipëri nuk duhet të përdorin taktika jashtë parlamentare për interesat e tyre sepse kështu nxisin krizë politike.  “S’duam t’i shohim partitë sërish në rrugë duke përdorur mënyra jashtëparlamentare për të përparuar me qëllimet politike. Mendojmë se është me rëndësi të përqendrohemi te proceset politike dhe të shmanget dhuna e konflikti, si dhe të gjenden zgjidhjet e mundshme me dialog. Është thelbësore, shumë me rëndësi për të ardhmen e Shqipërisë. Po të përparojë demokracia parlamentare, Shqipëria ka të ardhme të shkëlqyer. Një nga gjërat që do të bëjmë, veç të tjerave që kemi bërë dhe që do të vazhdojmë, është mbështetja e zgjedhjeve dhe aspekteve të demokratizimit, duke mbështetur parlamentin dhe demokracinë parlamentare. Mendojmë se është e rëndësishme, diçka që tani i ka mundësitë për t’u riafirmuar”, tha ai.  Më tutje ai ka përmendur si pika shqetësues në Shqipëri, trafikun njerëzor, pasi shumë emigrantë futen në borxhe për të arritur në Angli dhe më pas duhet t’i shlyejnë ato përmes krimit.