Nga Korça ku ndodhej në një vizitë, ambasadori në largim i Gjermanisë në Shqipëri, Peter Zingraf, apeloi që vendet e Ballkanit të mos bëjnë hapa pas dhe të fokusohen te agjenda e Procesit të Berlinit.
Zingraf vlerësoi si pozitiv faktin se vëmendja është përqëndruar këtë vit te Procesi i Berlinit, i iniciuar nga ish-kancelarja Angela Merkel.
“Procesi i Berlinit asokohe u iniciua nga ish-kancelarja Merkel, pikërisht për të qëndruar në anë të Shqipërisë dhe gjithë rajonit për të përshpejtuar, ndihmuar dhe mbështetur rrugën e Shqipërisë dhe rajonit drejt BE.
Kuptohet që ky nuk është proces i institucionalizuar apo i zyrtarizuar në këtë këndvështrim, pasi proceset e vërteta të institucionalizuara dhe zyrtarizuara gjenden dhe zhvillohen në Bruksel, në kuadër të zgjerimit të BE, por sigurisht Shqipëria ka në dorë që në kuadër të Procesit të Berlinit të bëjë shumëçka për të ndihmuar procesin e integrimit të vet dhe vendeve të rajonit në BE”, tha diplomati gjerman.
Në vijim ai theksoi se Gjermania është e angazhuar në të gjashta shtetet e Ballkanit, në funksion të gjetjes së pajtimit dhe proceseve që i sjellin më afër vendet e Ballkanit.
“Do të doja që të gjashta vendet nuk do të duhet ti lejonin vetes hapa pas sepse hapat pas, duke konsideruar dhe situatën në botë, do të ishin vërtet hapa negativë. Por mund të them se forumi i Procesit të Berlinit ka arritur shumëçka në këtë drejtim, prej 2014-ës ka bërë që qeveritë të ulen në një tavolinë në mënyrë të rregullt dhe periodike. Ndaj unë do të thoja që shfrytëzojeni këtë mundësi që ju jep procesi i Berlinit për të qenë sa më afër njëri tjetrit”, tha Zingraf.
Procesi i Berlinit nisi me shumë entuziazëm rreth 8 vite më parë, ndërsa në vitet e fundit, vëmendja u përqëndrua në nismën e “Open Balkan”, e iniciuar dhe e mbështetur nga Kryeministri Edi Rama, Presidenti serb, Aleksander Vuçiç dhe më pas nga Maqedonia e Veriut, me kryeministrin Zoran Zaev. Nismën së Open Balkan nuk iu bashkuan Kosova, Bosnja dhe Mali i Zi, edhe pse në takimet e fundit para shpërbërjes së nismës, mori pjesë edhe kryeministri malazez, Dritan Abazoviç. “Open Balkan” mbështetej gjithashtur nga Alex Soros, që ishte pjesë e takimeve të drejtuesve të 3 vendeve të Ballkanit Perëndimor, ndërsa Brukseli zyrtar shprehej skeptik, edhe pse apelonte për bashkëpunim mes të gjitha vendeve dhe gjithëpërfshirje.
Discussion about this post