Ambasadori i OSBE në Shqipëri, Vincenzo Del Monaco ka qenë sot në Elbasan ku ka zhvilluar disa takime pune me Drejtorin e Policisë së Qarkut dhe Përfaqësuesit e komuniteteve fetare në Qendrën e Bashkëpunimit Ndërfetar Elbasan. Më herët ai u takua me Kryetarin e Bashkisë, Gledian Llatja.
Në një prenoncim për mediat, ambasadori Monaco tha se në qendër të diskutimit me kryetarin e bashkisë Gledian Llatja ishte Këshilli i sigurisë.
“Këshilli Vendor i sigurisë, është një organ këshillues për çështjet e sigurisë në bashkëpunim me policinë dhe institucione të tjera. Kjo është eksperienca e parë në Elbasan, por edhe në mbarë vendin dhe synon që të ndikojë për përmirësimin e sigurisë dhe stabilitetit në komunitet. Ky organ i rëndësishëm jep kontributin për jetën sociale të qytetit duke përfshirë të rinjtë. Gjithashtu diskutuam edhe për rolin e grave, unë pata mbresa të mira kur mësova se numri i grave të punësuara në bashkinë Elbasan është rritur”, tha Del Monaco.
Pyetjes sa e motivuar dhe e vendosur ishte Policia e Shtetit për të zbatuar vetëm ligjin, si dhe për të luftuar krimin në përgjithësi dhe çdo krim elektoral, ambasadori iu përgjigj duke theksuar se OSBE ka trajnuar më së miri efektivët e Policisë së Shtetit.
“Pas vrasjes në Elbasan, ne bëmë një deklaratë me besimin te drejtësia sepse kështu funksionon demokracia. Ne jemi këtu për të mbështetur Shqipërinë”, tha ambasadori i OSBE.
