Ambasadori i OSBE-së në Shqipëri, Michel Tarran, u takua me drejtuesin e SPAK, Altin Dumani, për të rikonfirmuar bashkëpunimin e ngushtë dhe konstruktiv midis Prezencës së OSBE-së dhe këtij institucioni të drejtësisë. Ambasadori vlerësoi rolin kyç të SPAK-ut në forcimin e shtetit të së drejtës në vend, përmes ndjekjes penale të korrupsionit, forcimit të transparencës, integritetit dhe pavarësisë së sistemit gjyqësor.
Ai theksoi gjithashtu rëndësinë e punës së SPAK-ut në adresimin e krimeve zgjedhore gjatë zgjedhjeve parlamentare të këtij viti.
Gjatë takimit, Tarran dhe Dumani diskutuan për fushat aktuale dhe të ardhshme të bashkëpunimit, si dhe mënyrat për të rritur mbështetjen e OSBE-së në përputhje me objektivat strategjikë të SPAK-ut.
Ambasadori nënvizoi edhe rëndësinë e një qasjeje gjithëpërfshirëse me institucionet e tjera, për të adresuar çështje të tilla si përqindja e lartë e të paraburgosurve në Shqipëri.
Në këtë kuadër, OSBE po përgatit një trajnim të ri për parandalimin e pastrimit të parave, luftën kundër korrupsionit dhe bashkëpunimin ndërkombëtar në hetime komplekse.
Që nga viti 2021, Prezenca e OSBE-së ka bashkëpunuar ngushtë me SPAK dhe aktorë të tjerë të drejtësisë përmes projektit rajonal të monitorimit të proceseve gjyqësore, duke analizuar efektivitetin e reagimit gjyqësor ndaj korrupsionit dhe krimit të organizuar.
Aktivitetet e përbashkëta kanë përfshirë gjithashtu trajnime dhe tryeza të specializuara për prokurimet publike, kërkimin ligjor dhe kontratat PPP.
Prezenca e OSBE-së mbetet e përkushtuar për të mbështetur institucionet e drejtësisë në Shqipëri dhe për të avancuar reformën në drejtësi.
Discussion about this post