Ambasadori i ri i Shteteve të Bashkuara të Amerikës në Shqipëri, Eric Wendt, ka mbërritur në Pallatin e Brigadave, ku do të zhvillojë takimin me Presidentin e Republikës, Bajram Begaj, për të dorëzuar letrat kredenciale.
Me këtë ceremoni, Wendt nis zyrtarisht detyrën e tij si përfaqësues diplomatik i SHBA-së në Shqipëri, duke i dhënë fund edhe periudhës gati trevjeçare gjatë së cilës Uashingtoni nuk kishte një ambasador të emëruar në Tiranë.
Wendt mbërriti në Shqipëri ditën e djeshme, ndërsa emërimi i tij në këtë post vjen pas propozimit nga Presidenti amerikan Donald Trump dhe konfirmimit nga Senati i Shteteve të Bashkuara më 6 gusht.
Ambasadori i ri amerikan vjen në Tiranë me një karrierë të gjatë në fushën ushtarake dhe të sigurisë kombëtare. Ai ka më shumë se 34 vite shërbim në ushtrinë amerikane dhe ka mbajtur disa poste drejtuese në Forcat Speciale të SHBA-së, të njohura si “Green Berets”.
Gjatë karrierës së tij, Wendt ka pasur gjithashtu role të rëndësishme në bashkëpunimin ushtarak dhe atë të sigurisë, duke drejtuar edhe Komandën e Operacioneve Speciale të NATO-s.
Discussion about this post