Ambasadori gjerman në vendin tonë, Peter Zingraf ka komentuar sot vendimin për rritjen e pagave të deputetëve, gjë e cila ka sjellë një reagim të fortë në publik.
Ambasadori Zingraf ishte i pranishëm në takimin e Dhomës Gjermane e Industrisë dhe Tregtisë në Shqipëri (DIHA), mbi prezantimin e rezultateve të anketimit mbi klimën e biznesit në Shqipëri.
Pyetjes sesi e shikonte rritjen e pagave, Zingraf u përgjigj se deputetët e Kuvendit të Shqipërisë duhet të paguhen në mënyrë dinjitoze. Mes të tjerash ai theksoi se e rëndësishme është dhe niveli i përgjithshëm i pagave.
“Pagesa e parlamentarëve është një çështje delikate me këto karakteristika. Kush i ruan ata që ruajnë? Deputetët janë ata që vendosin për buxhetin, ndaj nuk dua të përzihem më një pyetje të tillë. Mendoj se deputetët e parlamentit të paguhen në mënyrë dinjitoze, si çdo parlamentar, që duhet të kryejnë një punë të mirë. E rëndësishme ama është dhe niveli i përgjithshëm i pagave. Qeveria shqiptare planifikon që të rrisë pagat në sektorin publik. Kjo lidhet dhe me debatin e emigracionit. Shqipëria duke pasur parasysh dhe rajonin, ka nivelin e pagave më të ulta në rajon. Pyetja konkrete diskutohet në mënyrë kontroverse në shoqëri të ndryshme, por debati i rëndësishëm në shoqërinë shqiptare është se sa ndikojnë te shoqëria.”- tha ambasadori.
Discussion about this post