Ambasadorja amerikane në OKB, Linda Thomas-Greenfield, ka deklaruar se Putin ka në plan të shkatërrojë dhe terrorizojë Ukrainën.
“Nëse dy javët e fundit na kanë treguar diçka, është se populli ukrainas nuk do të dorëzohet. Dhe shumë njerëz rusë, përfshirë shumë ushtarë rusë, nuk e duan këtë luftë”, tha Thomas-Greenfield në një takim të Këshillit të Sigurimit të OKB-së.
Thomas-Greenfield shtoi se “Putini është qartësisht i gatshëm të sakrifikojë jetën e mijëra ushtarëve rusë për të arritur ambiciet e tij personale”.
“Ne kemi paralajmëruar Moskën për javë të tëra se, në fund, Rusia do të jetë më e dobët, jo më e fortë, për nisjen e kësaj lufte. Kjo tashmë po rezulton e vërtetë”, tha ajo. “Pyetja është se sa shkatërrim është i gatshëm të shkaktojë presidenti Putin për këtë gabim të madh.”
Në fjalët e saj, Thomas-Greenfield u shpreh se SHBA-të janë “të indinjuar nga raportet e shtuara të sulmeve të Moskës që dëmtojnë civilët ukrainas në luftën e saj të paprovokuar dhe të pajustifikuar kundër popullit ukrainas” dhe shprehu shqetësim në rritje “për mbrojtjen e civilëve në këtë konflikt, veçanërisht grave dhe vajzave që janë të cenueshme ndaj dhunës me bazë gjinore, ukrainasit LGBTQI, si dhe popullsia e Ukrainës e të rriturve dhe personave me aftësi të kufizuara.”
Discussion about this post