Sinjalet më të fundit nga DASH për situatën tejet të kamufluar në PD kanë dhënë sinjalet e qarta, drejtpërdrejt tek secili qytetar, por mbi të gjitha te…e gjithë familja blu: Zero tolerancë për çdokënd që trajtohet si minues i demokracisë dhe konsumues i korrupsioneve të larta. Lëvizjet e tanishme të Berishës janë të stilit “bixhoz pa pare”, duke ditur fare mirë që guri i rëndë që peshon në qafën e tij, njëherësh ka atë rëndesë specifike totalisht të paevitueshme për njeriun që uzurpoi zyrat e së djathtës, me stilin e së vjetrës: Përça e sundo!
Tashmë në “terren” kanë zbritur ustallarët, të cilët fillimisht po çojnë selam me anë të mesazheve të koduara, por edhe tërësisht të qarta: Zero amnisti, zero falje, zero ndjesë, zero prapësim! Dhe një diçka të tillë Saliu e ka kuptuar fare mirë dhe tashmë i ka mbetur në dorë vetëm: Çim Peka dhe një kastë e vjetër edhe ajo e konsumuar dhe së shpejti e regjistruar në database të shumtë të përfitimit nga pushteti. DASH është aty për të përcjellë për të disatën herë që, jo vetëm që SHBA nuk kanë konsumuar një hap fals dhe të pamenduar, kurrsesi, por për të rithënë për të miliontën herë në folenë e Saliut dhe gjithë eskortës së tij që:
SHBA nuk mund të negociojnë, dialogojnë, bashkëpunojnë e ratifikojnë asnjë gjë, me ish-zyrtarë, të cilët janë klasifikuar si minues të demokracisë. E në këtë mënyrë në shpatullat e brishtë të Lulzim Bashës dhe skuadrës së tij ka “aterruar” më së fundmi edhe flota amerikane e bindjes, argumentit, karshi falsitetit për një cenim të sovranitetit, brenda shtëpisë së lirisë.
DASH ishte si kurrë ndonjëherë më parë i qartë dy herë: Së pari me reagimin e zëdhënësit për linçim të ambasadores Kim, dhe së fundmi vetëm sot për shifrat e asaj çka ndodhur e veprohet me personat, të cilët janë në rreth të kuq, për shkak se vitet e tyre të qeverisjes kanë prodhuar korrupsion të fortë dhe minim të politikave gjeostrategjike. Dikush mund ta perceptojë këtë fakt si një bonus për Bashën në një situatë “zjarri” në PD, por kjo është mbi të gjitha një thyerje hundësh definitive dhe direkte në drejtim të Berishës nën mesazhin e koduar: Kujdes, mos luaj me integritetin dhe staturë institucionale të DASH, të pëercjellë nëpërmjet ambasadorit amerikan.
E për hir të unitetit dhe momentit prag-përçarës të kampit opozitar, sërish DASH po kërkon të risjellë në vëmendje refuzimin kategorik të çdo lloj negocimi për këtë kategori personash. Pjesa tjetër mbetet në ndërgjegjen dhe koshiencën e gjithkujt për të menduar e parë pak më gjatë se emotiviteti aktual.
Discussion about this post