Nis sot zbatimi i amnistisë penale në institucionet e vuajtjes së dënimit në Shqipëri.
Sipas të dhënave, 541 të dënuar përfitojnë lirim të menjëhershëm dhe dalin sot nga burgjet, ndërsa qindra të tjerë përfitojnë ulje të dënimit ose forma të tjera lehtësimi.
Sipas raportimit, përveç 541 personave që lirohen, 803 të dënuar përfitojnë ulje dënimi, 173 persona përfitojnë nga rillogaritja e dënimit, 124 raste lidhen me disa vendime gjyqësore, ndërsa 67 të dënuar përfitojnë nga bashkimi i dënimeve. Po ashtu, 609 persona nuk përfitojnë nga amnistia penale, pasi nuk plotësojnë kriteret e përcaktuara në ligj.
Institucionet me numrin më të lartë të lirimeve janë:
Lushnja – 127 të liruar
Fieri – 104 të liruar
Reçi (Malësi e Madhe) – 101 të liruar
Rrogozhina – 94 të liruar
Korça – 60 të liruar.
Nga ana tjetër, numri më i lartë i personave që nuk përfitojnë nga amnistia rezulton në:
Reçi (Malësi e Madhe) – 160 të dënuar
Peqini – 156
Fieri – 80
Korça – 66
Burreli – 44
Durrësi – 32
Procesi i lirimit të të dënuarve ka nisur gjatë ditës së sotme dhe po zhvillohet në të gjitha institucionet e ekzekutimit të vendimeve penale, nën mbikëqyrjen e autoriteteve përkatëse.
Amnistia penale parashikon përfitime të ndryshme për kategori të caktuara të të dënuarve, duke përfshirë lirimin e menjëhershëm, uljen e dënimit dhe rillogaritjen e masës së vuajtjes së dënimit.
Amnistia parashikon lirimin e burrave të dënuar me burg deri në tre vjet ose me dënime më të lehta, si dhe të grave të dënuara me burg deri në katër vjet.
Përfitojnë edhe të burgosurit që janë duke vuajtur dënimin dhe u kanë mbetur deri në tre vjet burg për burrat dhe deri në katër vjet për gratë.
Një nga kriteret kryesore është edhe mosha. Përfitues janë burrat mbi 60 vjeç, gratë mbi 50 vjeç dhe personat që kanë qenë nën 18 vjeç në momentin e kryerjes së veprës penale, me përjashtim të rasteve kur janë dënuar për vepra të rënda që nuk përfshihen në amnisti.
Jashtë këtij ligji mbeten personat e dënuar për vrasje me dashje, krime kundër jetës, krime kundër njerëzimit, përdhunim, krime seksuale, trafikim të qenieve njerëzore dhe një sërë veprash të tjera të rënda penale.
Kujtojmë se nga kjo amnisti nuk përfitojnë as personat që janë fshehur, janë arratisur ose kanë shmangur ekzekutimin e vendimeve penale.
Amnistia, nuk zbatohet as për personat që janë gjykuar nga Gjykata Kundër Korrupsionit dhe Krimit të Organizuar (GJKKO) apo për çështjet që janë në juridiksionin e SPAK, pavarësisht veprës penale për të cilën janë dënuar.
Discussion about this post